Zara ապրանքանիշի հիմնադիր Ամանսիո Օրտեգայի հիմնադրամը 63 մլն եվրոյի բուժսարքավորումներ է գնել

Իսպանական Inditex հագուստի խանութների ցանցի և Zara առևտրային ապրանքանիշի հիմնադիր Ամանսիո Օրտեգայի հիմնադրամը 63 մլն եվրո արժողությամբ բժշկական սարքավորումներ է ձեռք բերել բուժհաստատությունների համար:

Ինչպես տեղեկացնում է El Mundo-ն, հիմնադրամն ավելի քան 1400 արհեստական շնչառական սարքավորումներ է ձեռք բերել ինտենսիվ թերապիայի բաժանմունքների համար, ինչպես նաև 3 մլն դիմակ՝ բուժանձնակազմի համար: Կորոնավիրուսի դեմ պայքարին աջակցելու նպատակով նաև թեստեր են ձեռք բերվել:

Հիվանդանոցներին տրամադրվել են նաև մահճակալներ և այլ սարքավորումներ:

Իսպանիայում կորոնավիրուսով վարակման առաջին դեպքը գրանցվել է հունվարի 31-ին: Վերջին տվյալների համաձայն՝ երկրում հիվանդությունից մահացել է 8269 մարդ, վարակվել՝ ավելի քան 94 000-ը: