Իսլանդական հեքիաթը շարունակվում է

Իսլանդիայի հավաքականի ֆուտբոլիստները շարունակում են զարմացնել եւ հիացնել: Նրանք կարողացան նվաճել Եվրոպայի առաջնության եզրափակիչ փուլի ուղեգիր: Ավելին, եզրափակիչ փուլում փայլուն տպավորություն թողեցին, իսկ հիմա հրաշալի խաղ են ցուցադրում աշխարհի առաջնության ընտրական փուլում:

Իսլանդիայում Հայաստանի համեմատ տասն անգամ քիչ մարդ է ապրում: Իսլանդիայի բնակլիմայական պայմանները հեռու են ֆուտբոլայինից: Ո՞րն է իսլանդական ֆուտբոլի հաջողության գաղտնիքը: Ամեն ինչ շատ պարզ է: Իսլանդական ֆուտբոլում կոռուպցիա չկա: Մանկապատանեկան թիմերի հետ գրագետ աշխատանք է տարվում, եւ որ ամենակարեւորն է, Իսլանդիայի ֆուտբոլի ֆեդերացիայի նախագահը հավաքականի մարզչի աշխատանքին չի միջամտում:

Այս անգամ, I խմբում ընդգրկված Իսլանդիայի հավաքականը 1:0 հաշվով հաղթեց բավական ուժեղ Խորվաթիայի ընտրանուն: Մագնուսսոնը հաղթական գոլը խփել է խաղի վերջին վայրկյաններին:

Այս խմբի մյուս խաղերում գրանցվեցին հետեւյալ հաշիվները՝ Ֆինլանդիա-Ուկրաինա՝ 1:2, Կոսովո-Թուրքիա՝ 1:4:

Խորվաթիան եւ Իսլանդիան ունեն 13-ական միավոր, իսկ Թուրքիան եւ Ուկրաինան՝ 11-ական:

D խմբում բոլոր երեք հանդիպումներն ավարտվեցին ոչ-ոքի: Իռլանդիա-Ավստրիա՝ 1:1, Մոլդովա-Վրաստան՝ 2:2, Սերբիա-Ուելս՝ 1:1:

Սերբիան եւ Իռլանդիան 12-ական միավորով կիսում են առաջին տեղը:

G խմբում Մակեդոնիան սեփական դաշտում 2:1 հաշվով պարտվեց Իսպանիային, Իսրայելը սեփական հարկի տակ անակնկալ պարտություն կրեց Ալբանիայից՝ 3:0 հաշվով, իսկ Իտալիան 5:0 հաշվով հաղթեց Լիխտենշտեյնին:

Իսպանիան եւ Իտալիան վաստակել են 16-ական միավոր եւ կիսում են առաջին տեղը:

Ի դեպ, վեց տուրից հետո 54 հավաքականների շարքում Հայաստանը 45-րդն է առավել շատ բաց թողած գոլերի ցուցանիշով: Սա բավական խոսուն փաստ է: 

Top-News.am