Այս խայտառակությունը հետո սովորական է դառնալու

Ամեն ինչ հենց այնպես չի լինում կամ հաստատ ոչինչ պատահական չի լինում: Չեռնոգորիան միջին կարգի եվրոպական հավաքական է, եւ երբ այդ հավաքականը կարողանում է հենց առաջին իսկ գրոհի ժամանակ գոլ խփել, նշանակում է որ մեր՝ Հայաստանի ազգային հավաքականի պաշտպանությունը լուրջ խնդիրներ ունի:

Ֆատոս Բեչիրայը դարպասի հրապարակում հանգիստ ընդունում է գնդակը, հարվածում, գոլ խփում, իսկ Տարոն Ոսկանյանը, կարծես թե, մտքերի մեջ էր ընկել, իսկ մինչ այդ մտքերի մեջ էր ընկել Հրայր Մկոյանը:

Գոլից հետո, մոտ 25 րոպե Հայաստանի ազգային թիմը տիրեց նախաձեռնությանը, անգամ այնպիսի տպավորություն ստեղծվեց, որ դեռ հնարավոր է փոխել խաղի ընթացքը, բայց դա ընդամենը տպավորություն էր:

28-րդ րոպեին Յովետիչը այնպես հեշտությամբ խաբս տվեց այն նույն Մկոյանին եւ Ոսկանյանին եւ հարվածեց դարպասին, կարծես նրանք մանկապատանեկան կրտսեր խմբի խաղացողներ լինեին, իսկ մեր հավաքականի դարպասապահ Արսեն Բեգլարյանն էլ, կարծես թե, մտածում էր, թե պարտավոր է բաց թողնել Յովետիչի հարվածը:

Գոլից հետո մեր թիմի խաղը սկսեց շատ ավելի վատ տպավորություն թողնել: Հանդիպմանը հետեւելն անգամ տհաճ էր: Վատ էին խաղում բոլորը, այդ թվում Հենրիխ Մխիթարյանը: Գորշությունը մի փոքր մեղմում էին Կորյանը եւ Պիզելին:

Առաջին խաղակեսի խորհրդանշական ամփոփումը Բեչիրայի անցումն էր աջ եզրով: Խաբս տվեց մեր երկու պաշտպանների, հարվածեց եւ միայն դարպասի փողը փրկեց Հայաստանի հավաքականին, իսկ խաղակեսի ամենավերջում գնդակը խղճաց մեր թիմին եւ չհայտնվեց դարպասում:

Երկրորդ խաղակեսի սկզբում Արսեն Բեգլարյանը՝ Հայաստանի հավաքականի դարպասապահը, հավանաբար մոռացավ, որ ինքը ոչ պաշտպան է, ոչ կիսապաշտպան եւ անկյունային դրոշակի մոտ պայքարի մեջ մտավ Չեռնոգորիայի ընտրանու հարձակվողի հետ:

54-րդ րոպեին Յովետիչը կրկին գրավեց Հայաստանի հավաքականի դարպասը: Վերցրեց գնդակը, առաջ շարժվեց, տեսավ, որ Տարոն Ոսկանյանը եւ դարպասապահը հիացած իրեն են նայում, հարվածեց՝ գոլ:

Չորրորդ գոլը չեռնոգորացիների կազմում կրկին խփեց Յովետիչը: Նա մեր հավաքականի դարպասապահի հրապարակում այնքան ազատ էր իրեն զգում, որ որոշեց մկրատաձեւ հարվածով գոլ խփել: Որոշեց եւ արեց: Արսեն բեգլարյանի մտքով էլ չանցավ, որ կարելի է մի քանի քայլ անել եւ որսալ գնդակը, չթողնելով, որ այն հասնի Յովետիչին: 

Ռուսլան Կորյանը խաղի վերջում մեկ գոլ խփեց, հաշիվը դարձնելով 4:1: Ի դեպ, երբ նա ստացավ գնդակը, խաղից դուրս վիճակում էր:

Հայաստանի հավաքականը պարտվեց: Պարտվում են նաեւ այլ հավաքականներ, բայց նրանք, որպես կանոն հետեւություններ են անում: Հայաստանի հավաքականը որեւէ հետեւություն չի անում: Հետո ավելի վատ է լինելու: Եւ ինչու պետք է լավ լինի մի երկրում, որտեղ ընտրակաշառք բաժանելը եւ վերցնելը սովորական երեւույթ է, որտեղ մանկապատանեկան ֆուտբոլում խայտառակ վիճակ է:

Top-News.am