ԵԱ. Հայ շախմատիստներից լավագույն արդյունքը գրանցած Հրանտ Մելքումյանը նվաճեց աշխարհի գավաթի ուղեգիր

Մինսկում ավարտվեց շախմատի Եվրոպայի անհատական առաջնությունը, որի չեմպիոնի տիտղոսը նվաճեց ռուս Մաքսիմ Մատլակովը: Նա, վրացի Բաադուր Ջոբավան եւ ռուս Վլադիմիր Ֆեդոսեեւը վաստակեցին 8.5-ական միավոր, բայց լրացուցիչ ցուցանիշներով ոսկե մեդալը բաժին հասավ Մաքսիմ Մատլակովին: Ջոբավան գրավեց երկրորդ տեղը, իսկ Ֆեդոսեեւը՝ երրորդ:

Հայաստանի 19 ներկայացուցիչներից լավագույն արդյունքը գրանցեցին Հրանտ Մելքումյանը, Սերգեյ Մովսեսյանը, Գաբրիել Սարգսյանը, Սամվել Տեր-Սահակյանը, Հայկ Մարտիրոսյանը եւ Արամ Հակոբյանը, որոնք վաստակեցին 7.5-ական միավոր եւ բաժանեցին 15-38-րդ տեղերը: Լրացուցիչ ցուցանիշներով Հրանտ Մելքումյանը գրավեց 19-րդ տեղը եւ նվաճեց 2017-ի աշխարհի գավաթի խաղարկության ուղեգիր:

Արման Միքայելյանը եւ Արման Փաշիկյանը վաստակեցին 7-ական միավոր, Մանուել Պետրոսյանը եւ Վահե Բաղդասարյանը՝ 6.5-ական, իսկ Զավեն Անդրիասյանը՝ 6:

Այս տարի Եվրոպայի առաջնությանը մասնակցում էին 395 շախմատիստներ, այդ թվում՝ 171 գրոսմայստեր:

Եվրոպայի անհատական առաջնությունը ընտրական փուլ է 2017-ի աշխարհի գավաթի խաղարկության համար: Ըստ ՖԻԴԵ-ի կանոնադրության ու Շախմատի Եվրոպական Միության խորհրդի որոշման՝ ուղեգիր են նվաճում 22 լավագույնները:
NEWS.am Sport