Էրդողանի իշխանությանը սպառնո՞ւմ են նրա նախկին դաշնակիցները
Թուրքիայի նախագահ Ռեջեփ Թայիփ Էրդողանի 2 նախկին դաշնակիցները մտադիր են մրցակից կուսակցություններ ստեղծել՝ կապված իր ընդդիմախոսների դեմ նրա բռնապետական մարտավարության, տնտեսության անարդյունավետ կառավարման, օրենքի գերակայության անտեսման եւ քաղաքականությունը փոխելու ակնհայտ դժկամության հետ, գրում է Financial Times-ը:
Ակնկալվում է, որ նախկին վարչապետ Ահմեդ Դավութօղլուն, որը լքել է «Արդարություն եւ զարգացում» իշխող կուսակցությունը, եւ էկոնոմիկայի նախկին նախարար Ալի Բաբաջանը, ում աջակցում է նախկին նախագահ Աբդուլլա Գյուլը, պաշտոնապես իրենց կուսակցությունները կձեւավորեն մինչեւ տարեվերջ:
«Պառակտումը կարեւոր է ոչ միայն ԱԶԿ-ի ներսում աննախադեպ խզումների, այլ նաեւ պոտենցիալ վնասի պատճառով, որը հասցվում է ազգային քաղաքական բեմում Էրդողանի 17-ամյա տիրապետությանը: Երկրում Էրդողանին դեմ եւ կողմ բաժանված գրեթե հավասար ճամբարներին աջակցումը կարող է փոխել քաղաքական լանդշաֆտը»,- գրում է պարբերականը:
«Յուրաքանչյուր ձայն, որը կարող են նրանք ստանալ, կարող է փոխել ուժերի հավասարակշռությունը: Այդ պատճառով այդ նոր կուսակցությունները կարեւոր դինամիկա են թուրքական քաղաքականության մեջ»,- FT-ին ասել է սոցիոլոգ Իբրահիմ Ուսլուն:
Նախկին նախարարները հայտարարել են, որ ԱԶԿ-ի ղեկավարությունից դժգոհությունն աճել է 2016 թվականին պետական հեղաշրջման փորձից հետո կառավարության մասշտաբային զտումների, ֆինանսների նախարարի պաշտոնում Էրդողանի փեսայի՝ Բերատ Ալբայրակի նշանակման եւ այն պատճառով, որ Էրդողանն իր ձեռքն է վերցրել իշխանությունը:
Այս տարի տեղական ընտրություններում ԱԶԿ-ի պարտությունը կուսակցությունից դժգոհողներին ստիպեց գործել:
Ընդ որում, Դավութօղլուն եւ Բաբաջանը թիրախավորում են տարբեր լսարաններ:
Անկարայի մերձարեւելյան տեխնիկական համալսարանի քաղաքագիտության պրոֆեսոր Այշե Այատան պարբերականին հայտնել է, որ Դավութօղլուն հույս ուներ դիմել պահպանողական թուրքերին, այն դեպքում, երբ Բաբաջանը ձգտում է ստանալ ԱԶԿ-ի գլոբալացված մասի ու թուրքական բուրժուազիայի հավանությունը:
Բաբաջանը, ըստ վերլուծաբանների, հաջողության հասնելու մեծ շանսեր ունի:
«Էկոնոմիկայի նախկին նախարարն ընկալվում է որպես լավ ժամանակների կառավարող, այն դեպքում, երբ Դավութօղլուն կապված է Սիրիայում պատերազմի հանդեպ Թուրքիայի նվաճողական մոտեցման հետ, որը հանգեցրեց միլիոնավոր փախստականների Թուրքիա գալուն։ «Նրանց ժամանակը կառավարությունում գործում է Բաբաջանի օգտին, բայց Դավութօղլուի դեմ»,- ասել է FT-ին Istanbul Economics հետազոտական ընկերության թղթակից Ջան Սելջուքը։
Ակնկալվում է, որ նոր կուսակցությունները կձեւավորվեն առաջիկայում, թեեւ Թուրքիայում նախատեսված չէ ընտրությունների անցկացում մինչեւ 2023 թվականը։ Այնուամենայնիվ, երկրում, որտեղ վերջին 12 տարիներին անցկացվել է 14 ընտրություն կամ հանրաքվե, ոմանց դժվար է հավատալ, որ կանցնեն չորս տարի հետո կայանալիք հաջորդ ընտրություններում»։
Վերլուծաբանները կասկածում են, որ նոր կուսակցությունները կարող են հաղթել նախագահական ընտրություններում, բայց կարող են օգնել Ստամբուլի նոր քաղաքապետ Էքրեմ Իմամօղլուին բարձր պաշտոն զբաղեցնել։
Եվրամիությունը չի հասկանում Իրանում պատերազմի նպատակները. Կալաս
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Օրինազանց վարորդները հայտնաբերվել են, մեքենաները՝ տեղափոխվել պահպանվող հատուկ տարածք
Ռոմանոս Պետրոսյանը լուսանկարներ է հրապարակել ՀԷՑ-ի բաշխման ցանցի տրանսֆորմատորային ենթակայաններից
Ղարաբաղից տեղահանվածները պետք է կապեն իրենց ապագան Հայաստանի հետ
Մարմնամարզության տղամարդկանց հավաքականը տուն է վերադառնում
Տնային պայմաններում խնամքի ծառայություններ՝ տարեց կամ հաշմանդամություն ունեցող անձանց․ ուր դիմել
Ստեփանծմինդա-Լարս ավտոճանապարհը փակ է
Արսեն Զախարյանի տրանսֆերային արժեքն աճել է
Լոնդոնից գնված հայկական եկեղեցու փեղկն ու Արշիլ Գորկու գրաֆիկական աշխատանքն առաջիկա օրերին կցուցադրվ...