Քաղաքավարի բժիշկների պացիենտներն ավելի երկար են ապրում. Քեմբրիջի համալսարան

Գիտնականները հետաքրքիր հայտնագործություն են կատարել. պարզվում է՝ 2-րդ տիպի դիաբետով հիվանդները, որոնք հետազոտվում են քաղաքավարի բժիշկների մոտ, ավելի երկար են ապրում: Քեմբրիջի համալսարանի հետազոտության համաձայն՝ այս կարգի պացիենտների շրջանում մահվան հավանականությունը կրկնակի նվազում է:

Հետազոտության շրջանակում հարցում է անցկացվել 2-րդ տիպի դիաբետով 628 հիվանդի շրջանում, որոնք ընդհանուր պրակտիկայի 49 բժշկի հսկողության տակ էին: Փորձարկվողները պետք է գնահատեին բուժող բժշկի էմպատիայի ունակությունը, ինչպես նաեւ հայտնեին բուժման արդյունավետության մասին: Պարզվել է՝ այն պացիենտների շրջանում, որոնք հայտնել են ախտորոշումը կատարելու ժամանակ բժշկի դրսեւորած կարեկցանքի մասին, բուժման 13 ամիսը լրանալուց հետո մահվան հավանականությունը նվազել է 40-50 տոկոսով:

Առողջության վրա այսպիսի դրական էֆեկտի պատճառների թվում մասնագետները նշում են այն, որ իրենց բուժող բժշկին համակրող պացիենտները մեծ պատրաստակամությամբ են կատարում նրա նշանակած բոլոր ցուցումները: Արդյունքում՝ բուժման գրաֆիկին խիստ հետեւելը մեծացնում է դիաբետիկների կյանքի տեւողությունը:

Սրա հետ կապված գիտնականները բժիշկներին կոչ են անում մեծ ուշադրություն դարձնել միջանձնային հաղորդակցության ասպեկտներին, ինչը կարեւոր դերակատարում ունի բուժման երկարաժամկետ արդյունքի տեսակետից:

Հետազոտության արդյունքները հրապարակվել են Annals of Family Medicine ամսագրում: