ՏՄՊՊՀ-ում «հնի» ու «նորի» կռիվ է. Գեղամ Գևորգյանը կադ­րային ջարդ է սկսել

«168 ժամը» գրում է. «Տնտեսական մրցակցության պաշտպա­նության պետական հանձնաժողովում «հնի» ու «նորի» կռիվ է: Ըստ որոշ լուրերի՝ գրեթե 1 ամիս առաջ հանձնաժողովի նա­խագահ ընտրված Գեղամ Գևորգյանը կադ­րային ջարդ է սկսել և բացահայտ հայտա­րարում է, թե բազմաթիվ մարդկանց խոսք է տվել աշխատանքի տեղավորել իրեն վստահված կառույցում:

Եվ քանի որ ՏՄՊՊՀ-ի աշխատակիցները հիմնակա­նում քաղծառայողներ են, երկարատև աշ­խատանքային փորձ ունեն, առավել ևս՝ վարչությունների ղեկավարների շարքում անգամ դոկտորներ կան, այսինքն՝ չի կա­րող կամայականորեն հեռացնել պաշտոն­ներից, խորամանկ քայլ է մտածել՝ իրականացնել կառուցվածքային փոփոխություն­ներ:

Մեր թղթակիցը Գեղամ Գևորգյանից հե­տաքրքրվել է՝ ինչ կառուցվածքային փոփոխություններ է նախատեսել ՏՄՊՊՀ-ում:

Նա նշել է, որ դեռևս նման փոփոխություն­ներ չեն կատարվել, սակայն, ըստ էության, հաստատեց, որ դրանք լինելու են. «Կա­ռուցվածքային փոփոխությունները, երբ արդեն վերջնական որոշած կլինենք, կա­նենք: Այս պահին վերջնական որոշում չու­նենք»::

Նա հերքել է, թե կադրային ջարդ է սպասվում՝ ասելով. «Աշխատակազմից մեկ-երկու հոգի կարող են դուրս եկած լինել, բայց 90-95 % մարդիկ աշխատում են: Ես բոլոր աշխատակիցներին գնահատում եմ իրենց կատարած աշխատանքով: Եթե նախկհն կազմից էլ, նոր կազմից էլ կարո­ղանա պրոֆեսիոնալ աշխատել, կմնա, որևէ խնդիր չեմ տեսնում: Եթե մարդը չի կարողանում աշխատել, կամ, օրինակ, չի բավարարում չափանիշերին, չի մնա՝ ան­կախ նրանից, թե ինքը որ կազմից է»:

Թե ինչպե՞ս է աշխատել ՏՄՊՊՀ-ի նախ­կին կազմը, Գևորգյանն ասել է. «Իրենց առաջադրանքներ եմ տվել, կկատարեն, կտեսնենք՝ լա՞վ են աշխատում, թե՝ վատ: Նախկին աշխատանքով չեմ կարող գնահատել, որտե՞ղ տեսնեմ նախկին աշխատանքը, որ գնահատեմ»»,-գրում է թերթը:

Մանրամասները՝ թերթի այսօրվա համարում: