Ըստ քաղաքացու հաղորդման՝ Իջեւանի քաղաքապետը ներխուժել է իր սեփական տարածք եւ հարձակվել կնոջ վրա

Ոստիկանության Իջևանի բաժնի հետաքննչական բաժանմունքում նյութեր են նախապատրաստվում երեկ՝ հունիսի 15-ին, Տավուշի մարզում տեղի ունեցած միջադեպի փաստով:

Shamshyan.com-ի փոխանցմամբ՝ ժամը 09:15-ի սահմաններում ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել քաղաքացի Վալերի Մելիքբեկյանից, ով հայտնել է, որ Իջևան քաղաքի Անկախության 13/41 հասցեում գտնվող իրեն պատկանող տարածքում Իջևանի քաղաքապետ Վարդան Ղալումյանը քաղաքապետարանի աշխատակիցների հետ ապօրինի գործողություններ է կատարում տարածքում, և հարձակվել են տան անդամների վրա:

Ոստիկանությունում Վ. Մելիքբեկյանի կինը՝ Իջևանի բնակիչ, 51-ամյա Նարինե Մելիքբեկյանը հայտնել է, որ նույն օրը իրենց ընտանիքին պատկանող հողամասում շինարարների դեմ ակցիա իրականացնելու ժամանակ Իջևանի քաղաքապետ Վարդան Ղալումյանը մի քանի անգամ հարվածել է իր թիկունքին:

Հետաքննիչի որոշմամբ նշանակվել է դատաբժշկական փորձաքննություն, հանգամանքները պարզվում են:

Հիշեցնենք, որ մայիսի 23-ին Իջևան քաղաքի բնակիչ, Իջևանի ավագանու անդամ 56-ամյա Վալերի Մելիքբեկյանը դիմել էր կայքին և խնդրել կառավարության, անձամբ վարչապետ Նիկոլ Փաշինյանի ուշադրությունը, որպեսզի վերջ դրվի Իջևանի քաղաքապետ Վարդան Ղալումյանի կողմից պաշտոնական դիրքի օգտագործումը:

Ֆոտոլրագրող Գագիկ Շամշյանի հետ զրույցում Վ. Մելիքբեկյանն ասել էր. «2014-16 թվականներին որպես 50 տոկոս բաժնեմաս ձեռք եմ բերել Իջևան քաղաքի Անկախության 13/41 հասցեում գործող տարածքը: Բաժնետեր ընկերոջս հետ որոշել էինք 50-ից ավելի աշխատատեղով առևտրի կենտրոն կառուցել այդ հատվածում: Ամեն ինչ հարթ էր գնում մինչև այն պահը, երբ Իջևանի քաղաքապետ Վ. Ղալումյանը տարբեր մարդկանց միջոցով հորդորում էր, որ այդ տարածքը վաճառեմ իրեն: Իմ մերժումներից հետո սկսվեցին իսկական արհեստական խոչընդոտներ ստեղծվել քաղաքապետի կողմից: Տարիներ շարունակ ամբողջ օրերս անցկացրել եմ դատարանների դռներում:

Քաղաքապետը դիմել էր դատարան, որտեղ ի օգուտ վճիռ էին կայացրել, հետո ամենաբարձր ատյաններ ես եմ դիմել ու բոլորը որոշում են կայացրել ի օգուտ ինձ ու երբ փորձեցինք սկսել աշխատատեղի բացման ուղղությամբ աշխատանքներ կատարել, քաղաքապետը նորից սկսեց արհեստական խոչընդոտներ ստեղծել: Բաժնետեր ընկերս նադայել լինելով քաղաքապետի քայլերից , դուրս եկավ ու 2019 թ.-ից որպես 100 տոկոս բաժնետեր ես եմ հանդես գալիս: Քաղաքապետի ապօրինության մասին տեղեկացրել եմ իրավապահ մարմիններին, որտեղ էլ քննություն է կատարվել ու նրա նկատմամբ քրեական գործ է հարուցվել ՀՀ քր օր-ի 308 հոդվածի 1-ին մասի հատկանիշներով: Բայց միևնույն է ՝ քաղաքապետը 2 ոտքը դրել է մի կոշիկի մեջ ու պնդում է, որ կյանքի գնով էլ լինի, էդ տարածքը իրենով է անելու:

Վարչապետ Նիկոլ Փաշինյանը միշտ հայտարարում է, որ Հայաստանում անցել է զոռբայությունը, մարդիկ պաշտպանված են օրենքով ու նրանք կարող են ազատ՝ օրենքի շրջանակում, զբաղվել ցանկացած բիզնեսով: Հիմա ինչ է ստացվում. Ես ուզում եմ աշխատատեղեր ստեղծել, իսկ Իջևանի քաղաքապետը առաջնորդվում է զոռբայությամբ, խլոցիով:

Սաղ Իջևանն էլ գիտի, որ էս տարածքում առևտրի կենտրոն սարքելուց հետո 50-60 աշխատատեղ է բացվելու: Կոչ-խնդրանքս ուղղում եմ վարչապետ Ն. Փաշինյանին, որպեսզի իր հանձնարարությամբ ուսումնասիրեն այս խնդիրը ու կհամոզվեն, որ պետական պաշտոնյան, օգտագործելով պաշտոնական դիրքը, անհարկի արհեստական խոչընդոտներով փորձում է մեզանից խլել մեզ պատկանող հողատարածքը:

Հուսով ենք , որ կառավարությունը օպերատիվորեն կարձագանքի մեր բարձրացրած խնդրին և վերջապես կլուծվի այս խնդիրը», նշել էր Վ. Մելիքբեկյանը: