«Բորուսիան» պարտվեց ահաբեկիչների, իր իսկ պաշտպանների եւ մրցավարների ջանքերով

Ֆուտբոլի Չեմպիոնների լիգայի խաղարկության 1/4-րդ եզրափակիչ «Բորուսիա» Դորտմունդ-«Մոնակո» խաղը պետք է կայանար դեռ երեկ, բայց ահաբեկչական գործողության պատճառով հետաձգվեց մեկ օրով:

Այսօր կայացած խաղի առաջին խաղակեսում այնպիսի տպավորություն էր, որ գերմանական թիմը դեռ ուշքի չի եկել ահաբեկչությունից: Այսուհանդերձ, առաջին գոլը բաց թողեցին մրցավարական սխալի պատճառով: Մրցավարները չնկատեցին, որ Մբապեն գոլը խփեց խաղից դուրս վիճակից: իսկ հետո, չգիտես ինչու, Բենդերը որոշեց գլխի գեղեցիկ հարվածով գրավել սեփական դարպասը:

Երկրորդ խաղակեսում պատկերը բոլորովին այլ է: «Բորուսիան» անհամեմատ լավ խաղ ցուցադրեց, խփեց երկու գոլ (Դեմբելե, Կագավա), բայց կրկին պաշտպանների անփույտ խաղի պատճառով բաց թողեցին եւս մեկ գոլ Մբապեից եւ պարտվեցին 3:2 հաշվով:

Այս մրցավեճում ամեն ինչ դեռ առջեւում է, քանի որ նման զույգերի դիմակայությունում գրեթե որեւէ տարբերություն չկա, թե խաղը ում դաշտում է: Ուժերը գրեթե հավասար են:

Top-News.am