Պուտինը ոստիկանության երկու գեներալի է հեռացրել Գոլունովի գործի կապակցությամբ

Ռուսաստանի նախագահ Վլադիմիր Պուտինը հրամանագիր Է ստորագրել ոստիկանության երկու գեներալի՝ Անդրեյ Պուչկովին եւ Յուրի Դեւյատկինին աշխատանքից ազատելու մասին, ինչը հունիսի 13-ին հաստատել Է Կրեմլի մամուլի ծառայությունը, տեղեկացնում Է «Արմենպրես»-ը:

«Զբաղեցրած պաշտոնից ազատել ոստիկանության գեներալ-մայոր Յուրի Վլադիմիրի Դեւյատկինին՝ ՌԴ ՆԳ նախարարության Մոսկվա քաղաքի գլխավոր վարչության թմրանյութերի շրջանառության նկատմամբ հսկողության վարչության պետին. ոստիկանության գեներալ-մայոր Անդրեյ Պավելի Պուչկովին՝ ՌԴ ՆԳ նախարարության Մոսկվա քաղաքի գլխավոր վարչության Արեւմտյան վարչական օկրուգի ներքին գործերի վարչության պետին»,-ասված Է ՌԴ նախագահի հրամանագրում:

Ավելի վաղ ՌԴ ներքին գործերի նախարար Վլադիմիր Կոլոկոլցեւը Պուչկովի եւ Դեւյատկինի ազատման վերաբերյալ միջնորդություն Էր ուղարկել պետության ղեկավարի անունով: Պատճառը դարձել Է «Մեդուզա» ինտերնետ-հրատարակության լրագրող Իվան Գոլունովի նկատմամբ քրեական գործի շուրջ ստեղծված իրադրությունը:

Հունիսի 11-ին Կոլոկոլցեւը հայտնել Է, որ Գոլունովի հետապնդումը դադարեցված Է «հանցագործության կատարմանը նրա մասնակցության ապացուցված չլինելու կապակցությամբ», լրագրողն ինքը ազատ Է արձակվել տնային կալանքից, հաղորդել Է ՏԱՍՍ-ը:

Ավելի վաղ հայտնի էր դարձել, որ Մոսկվայի կենտրոնում կալանավորված և 2 օր առաջ կալանքից ազատված ռուսական «Մեդուզա» գործակալության լրագրող Իվան Գոլունովի և, ընդհանուր առմամբ, քրեական գործերի կեղծման դեմ երթ է անցկացվել, որի ժամանակ բերման է ենթարկվել ավելի քան 500 մարդ՝ զանգվածային միջոցառումների անցկացման կարգի խախտման համար:

Իվան Գոլունովին ձերբակալել էին հունիսի 6-ին՝ թմրանյութերի վաճառք իրականացնելու փորձի համար: Նրա դեմ հարուցված քրեական գործն ավելի վաղ կարճվել էր՝ ապացույցների բացակայության պատճառով: