«Մարզպետը կոպտագույնս խախտում է օրենքը». Նաիրա Զոհրաբյանը նրան խորհուրդ է տալիս հանգստացնող թեյ խմել

Կոտայքի մարզպետ Ռոմանոս Պետրոսյանը կոպտագույնս օրենք է խախտում` միջամտելով Աբովյանում քաղաքապետի ընտրություններին: Այս մասին NEWS.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը` անդրադառնալով Աբովյանում Կոտայքի մարզպետ Ռոմանոս Պետրոսյանի մասնակցությամբ այսօրվա միջադեպին:

Նշենք, որ մարզպետը, որ գտնվում է արձակուրդում, շրջում է ընտրական տեղամասերով, հետեւոմ ընտրությունների ընթացքին, տեղամասերից մեկում էլ հանձնաժողովի ԲՀԿ-ական անդամի ձեռքից քաղաքացիների անուներով եւ հեռախոսահամարնեով թուղթ էր հայտնաբերել եւ դիմել էր ոստիանություն: Տվյալ ընտրական տեղամասում դիտորդները դժգոհություն էին հայտնել մարզպետի այս գործողությունից եւ արձանագրել այն:

«Արդեն թեւավոր դարձած հայտնի խոսքով ասեմ` հանգիստ նստեք տեղներդ եւ թույլ տվեք, որ աբովյանցին իր ընտրությունը կատարի: Մարզպետը կոպտագույնս խախտում է օրենքը եւ իր բոլոր բացատրությունները, որ արձակուրդի մեջ է եւ այլն եւ այլն, դա իրեն իրավունք չի տալիս մոտենալ ընտարտեղամասին, ավելին, ինչ-որ բան անել, իրեն իրավուքն վերապահել վստահված անձանց հետ լեզվակռվի մեջ մտնելու, հանձնաժողովի անդամների մեջ լեզվակռվի մեջ մտնելու: Հասկանում եմ մարզպետի շփոթահար վիճակը, բայց նորից եմ կրկնում` հանգիստ նստեք տեղներդ, ասում եք, որ երկրում բան է փոխվել այլեւս, թույլ տվեք, որ տեղի ունենան ազատ եւ արդար ընտրություններ, եւ ինչպես մեզանից որեւէ մեկը, որեւէ ԲՀԿ-ական պատգամավոր իրեն թույլ չի տվել խառնվել գործընթացին, էնպես էլ որեւէ պաշտոնյա իրավունք չունի վարչական լծակ կիրառել, շրջել տեղամասերում` մտածելով, որ ինքն էնքան մեծ հեղինակություն ունի, որ իր շրջապտույտը կարող է մթնոլորտ փոխել»,- ասաց պատգամավորը:

Նաիրա Զոհրաբյանը նշեց, որ մարզպետը վարչական ռեսուրս է օգտագործում, եւ նրան խորհուրդ տվեց հանգստանալ, խմել հանգստացնող թեյ:

Նշենք, որ Աբովյանի քաղաքապետի ընտրություններում առաջադրվել է 5 թեկնածու: Նրանցից առաջատարներ են համարվում գործող քաղաքապետ Վահագն Գեւորգյանը եւ «Քաղաքացիական պայմանագիր» կուսակցության կողմից առաջադրված Գրիգոր Գուլյանը:

Մյուս թեկնածուներն են՝ Սասուն Գրիգորյանը, Արթուր Ղազարյանը, Մանուկ Մկրտչյանը։

Աբովյանում կա 27 տեղամաս։ Ընտրողների թիվը 44 600 է: Աբովյան համայնքում 14:00-ի դրությամբ 44519 քվեարկելու իրավունք ունեցող քաղաքացիներից ընտրությանը մասնակցել են 10258-ը կամ 23.04 տոկոսը: