Սիփան Փաշինյանի մեքենայից գողություն կատարողը 40-ամյա Հունան Ավետիսյանն է

Shamshyan.com-ի տեղեկություններով՝ երեկ հունիսի 5-ին, ոստիկանության Երևան քաղաքի վարչության քրեական հետախուզության բաժնի, ոստիկանության Արաբկիրի բաժնի քրեական հետախուզության բաժանմունքի ծառայողները բացահայտել են հունիսի 4-ին Ազգային ժողովի պատգամավոր Սիփան Փաշինյանի ավտոմեքենան թալանելու դեպքը։

Ինչպես հայտնում է ֆոտոլրագրող Գագիկ Շամշյանը, նշված հանցագործությունը կատարելու կասկածանքով Արաբկիրի ոստիկանություն է բերման ենթարկվել Ներքին Չարբախ թաղամասում բնակվող, սակայն Երևանի Ջրվեժ թաղամասում հաշվառված 40-ամյա Հունան Ավետիսյանը։

Գ. Շամշյանի տեղեկություններով՝ վերջինս ոչ միայն խոստովանել է կատարած գողությունը, այլև ոստիկանների բացատրական աշխատանքների արդյունքում ներկայացրել է գողոնը։ Ժամը 09։50-ից մինչև 20։20-ն ընկած ժամանակահատվածում նա կոտրել էր ճանապարհի թույլատրելի հատվածում կանգնած Lexus RX 350 մակնիշի 35 ՍR 882 համարանիշի ավտոմեքենայի ապակին և այնտեղից գողացել համակարգիչ, ինչպես նաև 20 տարեկան հնեցման «Արարատ» տեսակի կոնյակ։