Մոուրինյոն ցանկանում է չեմպիոնություն նոր երկրում եւ Չեմպիոնների լիգայի երրորդ գավաթը

Անգլիական «Մանչեսթեր Յունայթեդից» 2018թ․ դեկտեմբերին հեռացված պորտուգալացի մարզիչ Ժոզե Մոուրինյոն պատմել է իր առաջիկա նպատակների մասին։

«Նոր երկրում չեմպիոնությունն ու Չեմպիոնների լիգայի երրորդ գավաթը։ Սա այն է, ինչ ցանկանում եմ ունենալ առաջիկայում։ Բայց ես նաեւ ցանկանում եմ լինել երջանիկ։ Չեմ ընդունի առաջարկ, որը չի տա որոշակի երաշխիքներ»,- Մոուրինյոյի խոսքը մեջբերում է AS-ը։

Այս հայտարարությունից հետո եվրոպական մամուլը կանխատեսել է, որ Մոուրինյոյի հաջորդ ակումբը կլինի կամ ֆրանսիական ՊՍԺ-ն, կամ էլ գերմանական «Բավարիան»։

56-ամյա Մոուրինյոն «Պորտուի» հետ դարձել է Պորտուգալիայի կրկնակի, «Չելսիի» հետ՝ Անգլիայի եռակի, Միլանի «Ինտերի» հետ՝ Իտալիայի կրկնակի, Մադրիդի «Ռեալի» հետ՝ Իսպանիայի չեմպիոն։

Չեմպիոնների լիգայում նա հաղթել է «Պորտու» եւ «Ինտերի» հետ։