Տնտեսական հե­ղափոխության գաղափարն անհամատեղելի է քրեա­կան հետապնդումների ու ունեզրկման հետ

«Հրապարակ» թերթը գրում է.

«Նախօրեին ՀՀ վարչապետի հայ­տարարությունը՝ «հեղափոխության երկրորդ՝ ամենակարևոր փուլի մեկնարկի» մասին, տարակուսանքի տեղիք տվեց: Չէ՞ որ ընդամենը ամիսներ առաջ հայտարարվել էր, որ սկսվում է տնտեսական հեղափոխության փուլը: Ինչ է, տնտեսական հե­ղափոխությունը չհաջողվեց, անցնում ենք մյուս՝ դատական հեղափոխությա­նը, թե ուղղակի տնտեսական հեղափոխությունն անորոշ ժամանակով հե­տաձգվում է, առաջ է բերվում արդարադատության խնդիրը:

Հեղափո­խության առաջնորդն այդ մասին ոչինչ չասաց: Սակայն, դատելով այս օրերի իրադարձություններից, դատական հեղափոխությունն էլ հարթ չի ընթա­նում, և այստեղ էլ շուտով նահանջ կարձանագրենք, որովհետև հստակ ծրագիր չկա, իսկ դատարանների դռները փակելը ոչ միայն միջազգային հանրությունը, այլև մեր հասարա­կության գրագետ հատվածը ևս չի ողջունում, դրա մեջ լուրջ վտանգներ է տեսնում:

Եվ անգամ անծանոթ տերմինների օգտագործումը՝ վեթինգ, անցումային արդարադատություն և այլն, վճռական հայտարարություննե­րը՝ կոռուպցիայի դեմ պայքարելու, արդար և թափանցիկ դատական համակարգ ձևավորելու, ժողովրդի դատական իշխանություն հաստա­տելու կամքի մասին, առանձնապես համոզիչ չեն և շատ բան չեն ասում հանրությանը:

Իսկ համաշխարհա­յին հեղափոխությունների փորձն ուսումնասիրած մարդիկ այլ բան էլ են ասում՝ ինչ հեղափոխություններ էլ որ Հայաստանում իրականացվեն, ինչքան էլ կոռուպցիան արմատախիլ արվի, մշակութային ու հոգևոր վերելք ապահովվի, հաջողելու միակ ճանապարհը տնտեսական հեղափոխությունն է, ավելի շուտ՝ երկրի տնտեսական վերելքը:

Եթե երիտասարդ իշխա­նությունները չկարողանան բեկում առաջացնել տնտեսության մեջ, ոչինչ չի փրկի նրանց: Իսկ տնտեսական հե­ղափոխության գաղափարն անհամատեղելի է քրեա­կան հետապնդումների ու էքսպրոպրիացիայի հետ»,-գրում է թերթը:

Նյութն ամբողջությամբ կարդացեք թերթի այսօրվա համարում: