Լը Պենը պահանջում է, որ Եվրախորհրդարանի ընտրություններում պարտվելու դեպքում Մակրոնը հեռանա. լրատվամիջոց

«Ազգային միավորում» կուսակցության նախագահ Մարին Լը Պենի կարծիքով՝ Եվրախորհրդարանի առաջիկա ընտրությունները Ֆրանսիայի համար վերածվել են նախագահ Էմանուել Մակրոնին վստահություն հայտնելու հանրաքվեի, հայտնում է Le Parisien-ը:

Քաղաքական գործիչը համոզված է, որ այդ դեպքում Մակրոնը պետք է հետեւի գեներալ Դը Գոլի օրինակին եւ իր պաշտոնից հեռանա, եթե հանրաքվեում պարտվի:

«Եվրախորհրդարանի ընտրությունները դառնում են Մակրոնին կողմ, թե դեմ հանրաքվեի: Ես դրան համաձայն եմ, բայց այսօրվա պայմաններում նա պետք է վարվի ճիշտ նույն կերպ, ինչպես գեներալ Դը Գոլը. եթե նա ընտրություններում պարտվի, ապա պետք է հեռանա»,- LCI-ի եթերում ասել է ֆրանսիացի քաղաքական գործիչը: Նա ընդգծել է, որ հանրապետության նախագահն այսօր կատարում է կուսակցության ղեկավարի եւ ընտրարշավի ղեկավարի դերը:

Լը Պենի խոսքով՝ Մակրոնը «իրեն կրկին պահում է որպես որոշակի շարժման նախագահ՝ մի կողմ թողնելով միլիոնավոր ֆրանսիացիներին, որոնց այլեւս չի դիմում, որոնց հաշվի չի առնում, եւ որոնց դեմ նույնիսկ, ինչն ամենավատթարն է, պայքարում է»:

Լը Պենը Մակրոնին նաեւ մեղադրել է այն բանում, որ առաջին նախագահն է դարձել, որը Եվրախորհրդարանի ընտրությունների նախաշեմին իր իմիջն օգտագործում է կուսակցության ծրագրերն առաջ մղելու համար:

Պարբերականը հայտնում է, որ այսօրվա դրությամբ հարցումները ցույց են տալիս քվեարկության նախաշեմին Մակրոնի եւ Լը Պենի կուսակցությունների միջեւ նվազագույն տարբերություն:

Պարբերականը հիշեցնում է, որ ավելի վաղ Ռումինիայում տեղի ունեցած Եվրամիության գագաթնաժողովի արդյունքներով մամուլի ասուլիսի ժամանակ Մակրոնը հայտարարել էր, որ «բոլոր ջանքերը կգործադրի», որպեսզի Լը Պենի կուսակցությունը մայիսի 26-ին անցկացվող Եվրախորհրդարանի ընտրություններում պարտվի: