ԱՄՆ որոշ պաշտոնյաներ ձգտում են պատերազմ սկսել Իրանի դեմ, որը նրանց համար կլինի ինքնասպանություն․ Իրանի ԱԳ նախարար

Թեհրանը չի ցանկանում պատերազմել Վաշինգտոնի հետ, սակայն կպաշտպանվի, եթե ԱՄՆ-ն նախաձեռնի զինված ընդհարումներ Իրանի հետ: Հայտարարել Իրանի արտաքին գործերի նախարար Մոհամմադ Ջաֆար Զարիֆը РИА Новости գործակալության հետ զրույցում:

«Ըստ երևույթին նրանք, ովքեր սկսել են ԱՄՆ-Իրաք պատերազմը 2003թ-ին, ձգտում են սկսել մեկ այլ պատերազմ`արդեն Իրանի դեմ: Դա ինքնասպանություն է հենց իրենց համար: Թրամփի վարչակազմի որոշ պաշտոնյաներ ձգտում են նման պատերազմ սկսել, որը հենց իրենց համար հավասար կլինի ինքնասպանության»,- ասել է Զարիֆը:

«Իրանը երբեք չի ցանկացել որևէ մեկի հետ պատերազմել, սակայն բավական է, որ ԱՄՆ-ն ձեռնարկի որեւէ բախում Իրանի հետ, մենք ողջ ուժով կպաշտպանենք մեր ազգային շահերը և մեր երկիրը»,- հավելել է Իրանի նախարարը`պատասխանելով հարցին, թե հավանական է արդյոք պատերազմը Իրանի և ԱՄՆ-ի միջև:

Ազգային անվտանգության հարցերով ԱՄՆ նախագահի խորհրդական Ջոն Բոլթոնն ավելի վաղ հաղորդել էր, որ ԱՄՆ-ն Իրանի ափերի մոտ է ուղարկում «Աբրահամ Լինքոլն» ավիակիրը և ռմբակոծիչներ:

Նրա խոսքով՝ այսկերպ Վաշինգտոնը «պարզ և հստակ ազդակներ է ուղարկում իրանական վարչակազմին, որ Միացյալ Նահանգների կամ նրա դաշնակիցների շահերի վրա ցանկացած հարձակում կհանդիպի անողոք պատասխանի»:

Իրանի ազգային անվտանգության խորհուրդը, ի պատասխան Վաշինգտոնի որոշմանը՝ Իսլամական հեղափոխության պահապանների կորպուսը (IRGC- ը, իրանական զինված ուժերի մի մասը) հայտարարելու ահաբեկչական կազմակերպություն, ԱՄՆ կենտրոնական հրամանատարությունը (CENTCOM) ճանաչեց որպես ահաբեկչական կազմակերպություն, իսկ Միացյալ Նահանգները՝ որպես «ահաբեկչության հովանավոր-պետություն»: