Էլեգանտ Մելանյա Թրամփը՝ Սպիտակ տանն Աղոթքի ազգային օրվա միջոցառմանը (լուսանկարներ)

Միացյալ Նահանգների առաջին տիկին Մելանյա Թրամփն ամուսնուն՝ նախագահ Դոնալդ Թրամփին ուղեկցել է Աղոթքի ազգային օրվա միջոցառմանը, որը կազմակերպվել էր Սպիտակ տան կանաչազարդ պարտեզում:

Ինչպես նշում է Daily Mail-ը, 49-ամյա նախկին մոդելը հատուկ այս առիթով կրել է մուգ կանաչ Emilia Wickstead էլեգանտ զգեստ՝ 2010 դոլար արժողությամբ, ինչպես նաև արդեն իր «այցեքարտը» դարձած բարձրակրունկներ:

Նախագահն ու առաջին տիկինը ձեռք ձեռքի տված են հայտնվել հավաքվածների առաջ, ինչից հետո Դոնալդ Թրամփը մոտեցել է բարձրախոսին և խոսել վերջին շրջանում ԱՄՆ-ում և աշխարհի տարբեր անկյուններում տեղի ունեցած ահաբեկչությունների, մարդկային կյանքեր խլած զինված հարձակումների մասին:

«Մենք ամբողջ ուժով պայքարելու ենք և հաղթելու ենք հակասեմականությանը»,-հայտարարել է Թրամփը՝ խոսելով օրերս Կալիֆոռնիայի սինագոգներից մեկում տեղի ունեցած հարձակման մասին:

Բացի այդ, Միացյալ Նահանգների նախագահը ևս մեկ անգամ դատապարտել է Շրի Լանկայում, Նոր Զելանդիայում տեղի ունեցած ահաբեկչությունները, որոնց հետևանքով ավելի քան 400 մարդ է զոհվել: Նա ընդգծել է, որ ԱՄՆ-ն ամեն ինչ անելու է հավատացյալների մասին հոգ տանելու, նրանց խաղաղ պայմաններում ապրելու, աղոթելու իրավունքը պաշտպանելու համար:

Միջոցառմանը ներկա են եղել քրիստոնյա, հրեա, մահմեդական, հինդու և սիկհ հոգևորականներ:

Ավելի ուշ Աղոթքի ազգային օրվա կապակցությամբ ընթրիք է մատուցվել, որին առաջին տիկինն արդեն զգեստափոխված է ներկայացել:

Աղոթքի ազգային օրն ԱՄՆ-ում նշվում է 1988թ. ի վեր: