«Ձեռքներդ հեռո՛ւ Ալսուից». Իոսիֆ Պրիգոժինը մանկական «Ձայն»-ի շուրջ սկանդալի ֆոնին աջակցել է հայտնի երգչուհուն

Ռուսական շոու բիզնեսի հայտնի պրոդյուսեր Իոսիֆ Պրիգոժինն իր աջակցությունն է հայտնել երգչուհի Ալսուին, որն այս օրերին համընդհանուր քննադատության թիրախում է հայտնվել այն պնդումների պատճառով, համաձայն որոնց՝ մանկական «Ձայնը» երաժշտական նախագծում իր դստեր հաղթանակը «գնված» է եղել:

Ինչպես նշում է lenta.ru-ն, Պրիգոժինը կոչ է արել մարդկանց չհալածել Ալսուին և նրա ընտանիքին:

«Ձեռքներդ հեռու տարեք Ալսուից: Այն, որ նրա աղջիկը հաղթել է, չի նշանակում, որ նա հայրենիքը դավաճանել է կամ հեղափոխություն է արել»,-իր վրդովմունքն է հայտնել պրոդյուսերը՝ շեշտելով, որ Ալսուն որևէ վատ բան չի արել:

Պրիգոժինի համոզմամբ՝ հեռուստանախագծում երեխայի՝ Միկելա Աբրամովայի վատ ելույթը չպետք է հանրային բողոքի առիթ դառնա:

«Երեխային, նրա ընտանիքին հալածում են: Եվ եթե նույնիսկ նա երեք անգամ նոտաներից դուրս է երգել, սա նրան ոտնատակ տալու առիթ չի տալիս»,-հավելել է Պրիգոժինը:

Պրոդյուսերի կարծիքով՝ Ալսուի ընտանիքը միանգամայն իրավունք ուներ մյուսներին խնդրելու քվեարկել իրենց երեխայի օգտին:

«Ես նույն կերպ կվարվեի»,-ասել է նա:

Ավելի վաղ հայտնի էր դարձել, որ ՌԴ Կուրսկի մարզի գործարաններից մեկի աշխատակիցները ներգրավված են եղել Միկելա Աբրամովայի համար հաղթանակ ապահովելու գործում և կոլեկտիվ քվեարկել են նրա օգտին: Ընդհանուր առմամբ քվեարկությանը մասնակցել է 500 մարդ, որոնք 3000-ական ռուբլի են ստացել դրա դիմաց:

Աղջիկը եզրափակչում հաղթել է ձայների մեծ առավելությամբ, ինչից հետո համացանցի օգտատերերը ենթադրել են, որ մրցույթի արդյունքները «սարքված» են եղել: