«Սպայկա»-ի 7 մլրդ դրամի չվճարված հարկերը միայն 2015-ի համար են, եւս 3 տարվա հաշվարկներ արվում են. ՊԵԿ նախագահ

«Սպայկա» ընկերության 7 մլրդ դրամի չվճարված հարկային պարտավորությունը վերաբերում է միայն 2015 թվականին, մինչդեռ պետք է հաշվարկներ կատարվեն 2015-2018 թվականների համար: Այս մասին, այսօր՝ ապրիլի 30-ին, ԱԺ-ում լրագրողների հետ զրույցում նշեց ՊԵԿ նախագահ Դավիթ Անանյանը՝ հավելելով, որ այդ թիվը հավանաբար կաճի:

Հարցին, թե սպասե՞նք նման խոշոր բացահայտումներին, Դավիթ Անանյանն արձագանքեց. «Սպասեք: Հույսը վերջինն է մահանում, հույսատերը՝ նախավերջինը»:

Հիշեցնենք, որ ապրիլի 8-ին Երեւան քաղաքի ընդհանուր իրավասության դատարանը բավարարել էր ՊԵԿ քննչական վարչության քննիչի միջնորդությունը և «Սպայկա» ՍՊԸ-ի հիմնադիր-տնօրեն Դավիթ Ղազարյանի նկատմամբ երկամսյա կալանքի որոշում կայացրել։

2019 թ. ապրիլի 4-ին Դավիթ Ղազարյանին մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասով (առանձնապես խոշոր չափերով hարկ, տուրք կամ պարտադիր այլ վճար չկատարելը):

Ըստ ՊԵԿ հաղորդագրության՝ «Սպայկա» ընկերությունը պետական բյուջե չի վճարել ընկերության ձեռնարկատիրական գործունեության արդյունքում առաջացած 7.036.666.312 ՀՀ դրամ մաքսատուրք եւ հարկ։