Դատարանն ավարտեց «Սպայկա»-ի տնօրենի վերաքննիչ բողոքի քննությունը, որոշումը կհրապարակվի վաղը

Դատարանն այսօր ավարտեց «Սպայկա» ընկերության տնօրեն Դավիթ Ղազարյանի վերաքննիչ բողոքի քննությունը։

Ղազարյանի պաշտպաններից Կարեն Սարդարյանի փոխանցմամբ, որոշումը կհրապարակվի վաղը` 10.30-ին:

Պաշտպանը նաև տեղեկացրեց, որ Ղազարյանին գրավով ազատ արձակելու միջնորդություն են ներկայացրել Վերաքննիչ դատարան։

Թե ի՞նչ չափի գրավի մասին է խոսքը, պաշտպանը չմանրամասնեց, միայն նշեց՝ «ողջամիտ չափի»:

Ճշտող հարցին, թե, օրինակ, մեկ միլիարդ դրամը ողջամի՞տ չափ է, Սարդարյանը դրական պատասխանեց:

Նշենք, որ պաշտպանները բողոքարկում են ընդհանուր իրավասության դատարանի որոշումը, որով Ղազարյանը ապրիլի 8-ին կալանավորվեց:

Պետեկամուտների կոմիտեն ապրիլի 5-ին հայտարարել էր, որ գյուղմթերքի խոշոր փոխադրող «Սպայկան» չի կատարել իր հարկային պարտավորությունները՝ պետությանը պատճառելով 7 միլիարդ 36 միլիոն դրամի վնաս։ Դավիթ Ղազարյանը մեղադրվում է առանձնապես խոշոր չափի հարկ ու տուրք չվճարելու համար։