ԵՄ-ն պատրաստվում է ամերիկյան ապրանքների համար տուրքեր սահմանել

Եվրամիությունը պատրաստել է ամերիկյան այն ապրանքների ցանկը, որոնց վրա կարող է առեւտրային տուրքեր սահմանել՝ ի պատասխան Վաշինգտոնի համանման գործողությունների։ Խոսքը 20 միլիարդ դոլար ընդհանուր արժողությամբ ավելի քան 400 տեսակ ներկրվող ապրանքների մասին է՝ հայտնել է Եվրահանձնաժողովը։

Մասնավորապես, դրանում հիշատակվում են կենդանի եւ սառեցված ձկները, ընկուզեղենը, չրերը, կետչուպը, գինին, ծխախոտը, ալկոհոլային խմիչքները, ճամպրուկները, ինքնաթիռները, ուղղաթիռները, տրակտորները եւ տեսախաղերը՝ հայտնում է DW-ը։

Այդ ցուցակը նախնական է։ Եվրահանձնաժողովը հայտարարել այդ ցուցակի շուրջ հասարակական խորհրդակցությունների մասին, որպեսզի միջոցառումներ ձեռնարկի Boeing ընկերության շուրջ ծագած աղմուկի շրջանակներում՝ կապված Առեւտրի համաշխարհային կազմակերպության որոշման հետ։

Խորհրդակցությունները կշարունակվեն մինչեւ 2019թ․ մայիսի 31-ը։ Դրանց արդյունքում կորոշվեն շահագրգիռ կողմերը, որոնք, հնարավոր է, տուժել են Boeing-ին հատկացված ամերիկյան սուբսիդիաներից՝ ասվում է հայտարարության մեջ։

Ապրիլի 11-ին ԱՀԿ-ն հրապարակել էր ամերիկյան Boeing ավիաշինարարական կազմակերպության մասին վերջնական զեկույցը՝ խոստովանելով, որ 12 միլիարդ դոլարի չափով ԱՄՆ սուբսիդիաները խախտել են եվրոպական Airbus-ի հետ արդար մրցակցության սկզբունքները՝ զգալի վնաս հասցնելով վերջինիս։