Վիգեն Խաչատրյան․ Երեկվա ձախողումից հետո այսօր մեր տղաները կարծես կրկնակի «կատաղած» լինեին

Երեկվա Անդրանիկ Կարապետյանի ձախողումից հետո այսօր մեր տղաները մրցահարթակում ասես կրկնակի «կատաղած» լինեին: Այսպես Հակոբ Մկրտչյանի եւ Դավիթ Հովհաննիսյանի հաղթական մրցելույթները Բաթումիում ընթացող Եվրոպայի առաջնությունում մեկնաբանեց ծանրամարտի տղամարդկանց Հայաստանի հավաքականի երկրորդ մարզիչ Վիգեն Խաչատրյանը, փոխանցում է NEWS.am Sport-ի թղթակիցը:

«Երեկվա Անդրանիկ Կարապետյանի ձախողումից հետո այսօր մեր տղաներն կարծես կրկնակի «կատաղած» լինեին: Բայց ոչ թե մրցակիցների, այլ՝ ծանրամարտի եւ ծանրաձողի վրա: Հակոբ Մկրտչյանն ու Դավիթ Հովհաննիսյանն իրենց բարձր մակարդակը ցույց տվեցին մրցահարթակի վրա: Շատ լավ հանդես եկավ հատկապես Դավիթ Հովհաննիսյանը: Նա իր արդյունքները բարելավեց եւ իսկապես փայլուն հանդես եկավ:

Հակոբ Մկրտչյանի մրցելույթն ուղղակի աննկարագրելի էր, նրա բարձրացրած 207 կգ արդյունքը գերազանք էր: Այնպես որ մեր երկու ծանրորդների մրցելույթները ես գնահատում եմ գերազանց: Աշխարհի առաջնության համար Եվրոպայի առաջնությունում այս կիլոգրամները բարձրացնելը գերազանց է»,- ասաց Վիգեն Խաչատրյանը:

Հիշեցնենք, որ Հակոբ Մկրտչյանը նվաճեց Եվրոպայի չեմպիոնի կոչումը 89 կգ քաշայինների պայքարում։

Հայաստանի ներկայացուցիչը երկամարտում հավաքեց 371 կգ (Եվրոպայի ռեկորդ) եւ 1 կգ գերազանցեց երկրորդ տեղը գրաված վրացի Ռեւազ Դավիթաձեին։

Դավիթ Հովհաննիսյանը երկամարտի 360 կգ արդյունքով գրավեց երրորդ տեղը։

Պոկում վարժությունում Դավիթ Հովհաննիսյանը 165 կգ արդյունքով նվաճեց փոքր բրոնզե մեդալ, Հակոբ Մկրտչյանը 164 կգ-ով չորրորդն էր։ Հրում վարժությունում Դավիթ Հովհաննիսյանը ցույց տվեց 195 կգ։

Հակոբ Մկրտչյանը հրում վարժությունում բարձրացրեց 207 կգ՝ ապահովելով նաեւ փոքր ոսկե մեդալ։

Լուսինե Շահբազյան, Արսեն Սարգսյան (Բաթումի)