Սուդանցի զինվորականները հայտարարել են նախագահի եւ կառավարության հրաժարականի մասին

Լիբանանյան al-Mayadeen հեռուստաալիքը՝ հղում կատարելով իր աղբյուրներին, հավաստիացնում է, որ Սուդանի բանակը հինգշաբթի օրվա իր արտահերթ նիստում որոշել է պաշտոնից հանել երկրի նախագահ Օմար ալ Բաշիրին եւ հրաժարական պարտադրել կառավարությանը, տեղեկացնում է ՌԻԱ «Նովոստի»-ն։

Հեռուստաալիքի տվյալներով՝ բանակը կհայտարարի ռազմական խորհրդի ստեղծման մասին, որը երկիրը կղեկավարի անցումային շրջանում։ Նշվում է, որ այն կարող է տեւել մեկ տարի։

Սուդանյան Sudan Tribune թերթը տեղեկացնում է, որ Խարթումում տեղի է ունեցել երկրի ԶՈւ գլխավոր շտաբի արտահերթ նիստ՝ առանց նախագահ ալ Բաշիրի մասնակցության։ Թերթի տվյալներով՝ զինվորականները նաեւ վերահսկում են երկրի հեռուստատեսությունը. հեռուստատեսությամբ ցուցադրվում են «ռազմական քայլերգեր», առաջիկայում բանակը խոստանում է հանդես գալ «կարեւոր հայտարարությամբ»։

«Սուդանի բանակը որոշել է հանել Օմար ալ Բաշիրին պաշտոնից, ինչպես նաեւ նրա տեղակալներին ու օգնականներին, եւ հրաժարական պարտադրել կառավարությանը»,- տեղեկացնում է հեռուստաալիքը։

Նրա տվյալներով՝ Խարթումի փողոցներում ուժեղացված է բանակի ներկայությունը։

Սուդանում արդեն մոտ չորս ամիս շարունակվում են ժողովրդական ընդվզումները, որոնք սկսվել են հացի գների իջեցման պահանջով, բայց աստիճանաբար վերածվել են Օմար ալ Բաշիրի ռեժիմը փոխելու կարգախոսներով, որն իշխանությունում է արդեն 30 տարի։ Այդ ընթացում, ընդդիմադիրների եւ իրավապաշտպանների տվյալներով, սպանվել է մոտ 60 ցուցարար, հարյուրավորները տուժել են, կա մի քանի հազար կալանված։

Անցած հանգստյան օրերին հազարավոր ցուցարարներ դուրս են եկել Խարթումի եւ այլ քաղաքների փողոցներ, որպեսզի պահանջեն նախագահի հրաժարականը։ Մասնավորապես, ցուցարարները եկել են բանակի Գլխավոր շտաբի շենքի մոտ, որպեսզի զինվորականներին կոչ անեն «կանգնել ժողովրդի կողմում եւ հասնել նախագահի հրաժարականին»։ Քաղաքի մի շարք շրջաններում փոխհրաձգություն է սկսվել ցուցարարների միջեւ, որոնց աջակցել են որոշ զինվորականներ եւ անվտանգության աշխատակիցներ։

Վերջին շաբաթներին Սուդանում բողոքների կենտրոն է դարձել Խարթումում պաշտպանության նախարարության շենքերի համալիրը՝ նախագահի նստավայրից ոչ հեռու, որի առջեւ ցուցարարների մշտական վրանն է, եւ որտեղ գիշեր ու ցերեկ հարյուրավոր ընդվզողներ կան։