ԵՄ-ն «Բրեքզիթ»-ի հարցով նոր վերջնաժամկետ է սահմանել, սակայն դա կչեղարկվի՝ Եվրախորհրդարանի ընտրություններից Մեծ Բրիտանիայի հրաժարվելու դեպքում

Եվրամիության՝ Բրյուսելում կայացած գագաթնաժողովի ժամանակ կառույցի անդամ 27 երկրների առաջնորդները Եվրամիության կազմից Մեծ Բրիտանիայի դուրս գալու գործընթացի («Բրեքզիթ») նոր վերջնաժամկետ են սահմանել, գրում է Daily Mail-ը՝ Եվրախորհրդի ղեկավար Դոնալդ Տուսկին հղումով:

Գործընթացի նոր վերջնաժամկետը հոկտեմբերի 31-ն է:

«Անդամ երկրների առաջնորդները նախնական որոշմամբ այդ ժամկետն են ընտրել, սակայն որոշումը պետք է համաձայնեցվի Մեծ Բրիտանիայի վարչապետ Թերեզա Մեյի հետ»,- ասել է Տուսկը՝ հավելելով, որ Մեծ Բրիտանիայի վարչապետի դրական պատասխանի դեպքում ԵՄ առաջնորդները հունիսին կայանալիք գագաթնաժողովին կվերանայեն այդ որոշումը:

Տուսկը նաև նշել է, որ նոր վերջնաժամկետը կապված է Եվրահանձնաժողովի կազմի փոփոխության հետ, որը տեղի կունենա այս տարվա աշնանը:

Ի դեպ, Եվրամիության արտահերթ գագաթնաժողովի արդյունքներն ամփոփող հայտարարության մեջ ասվում է նաև, որ Մեծ Բրիտանիայի կողմից Եվրախորհրդարանի՝ մայիսի 23-26-ը կայանալիք ընտրություններն անցկացնելուց հրաժարվելու դեպքում վերջնաժամկետի մասին ընդունված նոր որոշումը կդադարի գործել, և Միացյալ Թագավորությունը ստիպված կլինի հունիսի 1-ին դուրս գալ Եվրամիության կազմից:

Հիշեցնենք, որ «Բրեքզիթ»-ի հարցով նախկին վերջնաժամկետն ապրիլի 12-ն էր: Մեծ Բրիտանիայի վարչապետն ավելի վաղ խնդրել էր գործընթացի ժամկետները հետաձգել առնվազն մինչև հունիսի 30-ը: