Օպերային թատրոնը 12 էջից կազմված իր հակափաստարկներն է ներկայացրել վարչապետին

Օպերային թատրոնը 12 էջի սահմանում հակափաստարկներ է ներկայացրել վարչապետ Նիկոլ Փաշինյանին, ով օրեր առաջ արտիստների հետ հանդիպման ժամանակ առաջարկեց նախարարության կողմից ներկայացված փաստարկներին ներկայացնել նաեւ իրենց հակափաստարկները։

Թատրոնի դիրիժոր Հարություն Արզումանյանն ասաց, որ պատասխան դեռ չեն ստացել, սպասում են․ «12 էջում շատ մանրամասն ներկայացրել ենք բոլոր հիմքերը։ Պատասխան նամակում ցույց ենք տվել, որ 99 տոկոսով իրենց ներկայացրած կետերը սուտ են եւ հորինված վարկած, իսկ 12 էջ միայն մեր գրությունն էր, տակը մի 30-50 էջ էլ կցված էին նաեւ հղումները»։

Ինչ վերաբերում է հանդիպման ընթացքում վարչապետի կողմից բարձրաձայնված Օրբելյանի գործուղումներին, բացակայություններին, ֆինանսական կորուստներին, ապա պարզաբանումներ են ներկայացրել նաեւ այդ մասով, ավելին՝ «Նազենի Ղարիբյանը նույնիսկ հարցազրույցներից մեկում ասել է, որ՝ այո, Օրբելյանը կապ չունի այդ կորուստների հետ, եւ դա եղել է մինչեւ իրեն։ Մենք թվերով գրել էինք, որ Օրբելյանի օրոք ոչ մի կոպեկի ստուգման խախտում չի եղել, ուղղակի Ղարիբյանը կամ նախարարությունը հատուկ միջից հանել էին տարեթիվը եւ դրել էին այդ թղթի մեջ, Փաշինյանն էլ այդ գրածն էր կարդում։ Օրբելյանը նշանակվել է 2017թ․ ամառվանից, իսկ այդ ստուգումները եղել են 2013-2016թթ․, այսինքն՝ ոչ մի կապ չկա նրանց մեջ։ Այդ բոլորը գրել, ուղարկել ենք, եթե պատասխան չլինի, նորից կգրենք»։

Այն դիտարկմանը, որ մշակույթի նախարարի պաշտոնակատարն ասել էր՝ ոչ մի փաստաթուղթ չի ներկայացվել, որ Օրբելյանն իր սեփական միջոցների հաշվին է ներկայացումներ արել, այլ ո՛չ պետական, Արզումանյանը պատասխանեց․ «Խնդիրն այն է, որ ասում են՝ մեզ ամբողջ տարվա համար հատկացրել են այսքան միլիարդ գումար, բայց դա միայն թատրոնի 600 հոգանոց ամբողջ կոլեկտիվի աշխատավարձն է նշել Ղարիբյանը, եթե դրանից վերցնես՝ բեմադրության ծախս անես, բա աշխատավարձ ո՞նց ես տալու։ Դա ասել է ուղղակի ասելու համար, բա 6-7 պրեմիերա ինչո՞վ ենք արել, դրանց հերթ չի հասնում։ Միակ կետն իր գրածների մեջ, որտեղ կա ճշմարտություն, դա գործուղումներն են, որոնց բոլորի համար Օրբելյանը նախօրոք դիմում է ներկայացրել նախարարություն եւ ստացել նախարարության թույլտվությունը։ Այսինքն, եթե դու վերջում ասելու էիր՝ սա պրոբլեմ է, ինչո՞ւ ես թույլտվություն տալիս»։ Նա ընդգծում է, որ այդ գործուղումները եղել են միայն հրավիրող կողմի եւ անձնական միջոցների հաշվին, որի արդյունքում էլ ձեռք են բերվում պայմանավորվածություններ, տեղի են ունենում հյուրախաղեր։

Ամսի 4-ին թատրոնում կայացած «Կախարդական սրինգի» պրեմիերային վարչապետը թեեւ ներկա չէր, փոխարենը ներկա էին նախագահի տիկինը, երկու փոխնախարարները․ «Նազենի Ղարիբյանը, բնականաբար, չէր եկել, նա առհասարակ երբեւէ չի եկել մեր ոչ մի պրեմիերային»։

Արզումանյանը նորից հիշեցնում է վարչապետի խոսքը, երբ նա խոստացավ պատժել այն մարդուն, որը միտումնավոր որեւէ փաստ սխալ գրած կլինի իրեն ներկայացված փաստաթղթերի մեջ։ «Հենց միայն այն կետը, որ վերաբերում էր 92 մլն-ի կորստին, արդեն սուտ չէ՞, դու դա դնում ես Օրբելյանի հիմքերի մեջ ու ներկայացնում ես Փաշինյանին, ինչն Օրբելյանի հետ կապ չունի։ Ամեն դեպքում, Ղարիբյանը թեկուզ նախարարությունների միավորումից հետո այլեւս չի աշխատի, բայց իր վնասը տվեց»,- ասում է Արզումանյանն ու հավելում, որ վերջին տարիներին թատրոնի կիսադատարկ դահլիճներն արդեն լցվել են, իսկ վերջին պրեմիերայի ժամանակ մարդիկ նույնիսկ անցումների վրա էին նստած, տոմս չկար․ «Ինչ Օրբելյանը եկել է, դատարկ դահլիճները լցվել են, հետո՝ միշտ նույն ներկայացումներն էինք տալիս, իսկ հիմա նոր ներկայացումներ կան, չնայած արանքում նաեւ հներն ենք խաղում»։

Դիրիժորն ընդգծում է՝ արտիստների տրամադրվածությունը բարձր է, հատկապես՝ տեսան, որ իրենց սատարողներ շատ ունեն, նույնիսկ քաղաքական գործիչների մեջ կան մարդիկ, ովքեր զանգահարում եւ ասում են՝ ձեզ հետ ենք․ «Մարդկանց աջակցությունը կա, ինչը ոգեւորող է, նույնիսկ տաքսի եմ նստում, տաքսիստն է իր աջակցությունը հայտնում, այսինքն՝ տաքսիստն էլ է էս գործով հետաքրքրված»։

Այս օրերին Կ․ Օրբելյանն աշխատանքային այցով ԱՄՆ-ում է, երեկ նախատեսված էր Օրբելյանի հանդիպումը Մետրոպոլիտեն օպերայի գլխավոր տնօրեն Պիտեր Գելբի հետ: Նախաձեռնությունը Պ. Գելբինն է, ով ցանկություն է հայտնել համագործակցության ծրագրեր մշակել Հայաստանի օպերային թատրոնի եւ Մետրոպոլիտեն օպերայի մեջեւ: Նյու Յորքում Կ. Օրբելյանը բանակցություններ է ունենալու խաչատրյանական բալետային ներկայացումների հյուրախաղերը կազմակերպելու նպատակով: