Իսկ դուք ասում եք իրավիճակ է փոխվել եւ առաջարկում խոսել փաստերով

Առաջընթաց է արդյոք հեռուստատեսության եւ ռադիոյի համար այն, որ Ռուբեն Ջաղինյանին փոխարինում է Արա Շիրինյանը, իսկ Մարկ Գրիգորյանին՝ Գարեգին Խումարյանը: Անկախ մասնագիտական որակներից այս հարցին պատասխանելը բարդ չէ: Իհարկե, առաջընթաց չէ, քանի որ ընտրվեցին նրանք, ովքեր վայելում էին գործող իշխանությունների աջակցությունը:

Առանց կենտրոնանալու Արա Շիրինյանի եւ Գարեգին Խումարյանի մասնագիտական որակների վրա, արդեն իսկ պարզ է, որ Հայաստանում ոչ իրավիճակ է փոխվել, ոչ էլ որեւէ ոլորտում հաղթել է ժողովրդավարությունը: Ընդամենը փոխվել են անունները: ՀՀԿ-ին փոխարինել է ՔՊ-ն, այնինչին, այսինչը: Ընդամենը: 

Մեզ մնում է արձանագրել, որ վատ կատագերգություն հիշեցնող մրցույթով կատարվեց կառավարող ուժի հերթական հրահանգը: Իհարկե, նույն կառավարող ուժի ներկայացուցիչը կարող է շատ հանգիստ առաջարկել խոսել փաստերի լեզվով եւ շատ հանգիստ կասեն՝ մրցույթ անցկացվել է՝ անցկացվել է, ընտրություն եղել ՝ եղել է: Եւ կստացվի, որ մենք զբաղված ենք լավ գործերը մրոտելով, իսկ իրենք այս գաղջ մթնոլորտում ծանր եւ լավ աշխատանք են կատարում:

Ամենավատն այն է, որ եթե մրցութային հանձնաժողովը, գոնե հանրային ռադիոյի պարագայում, կարող էր չկատարել վերեւից իջած հրահանգը, բայց ներքին գրաքննությունը, ներքին վախը, ներքին ստրուկն այնքան մեծ է, որ նրանք ընտրեցին նրան, ում կցանկանար այդ պաշտոնում տեսնել իշխանությունը:

Եւ այսքանից հետո ինչպես ինքներս մեզ խաբենք եւ ասենք կամ ընդունենք, որ իրավիճակ է փոխվել: Ոմանք կասեն՝ բայց չէր որ արդար եւ ազատ ընտրություններ են եղել մեր երկրում: Եւ արդար եւ ազատ ընտրություններին կարող են հավատալ միայն ամենամիամիտները, քանի որ ունենալ ահռելի բարձր վարկանիշ եւ իրականացնել աղաղակող եւ ցուցադրական ընտրախախտումներ եւ ընտրակեղծիքներ, մեղմ ասած, խենթություն կլիներ: 

Իսկ հիմա ՀՀ հանրային հեռուստառադիոընկերության խորհրդի նախագահը մի մարդ է, որը չի էլ թաքցնում, որ իր համար անընդունելի է այլակարծությունը, եւ որ վառ արտահայտված ՔՊ-ական է:   

Գեղամ Նազարյան

Top-News.am