Թրամփը «100 տոկոսով» պատրաստ է փակել ԱՄՆ-ի եւ Մեքսիկայի միջեւ սահմանը

Նախագահ Դոնալդ Թրամփը հայտարարել է, որ «100 տոկոսով» պատրաստ է փակել ԱՄՆ-ի եւ Մեքսիկայի միջեւ սահմանը՝ Կոնգրեսին եւ Կենտրոնական Ամերիկայի կառավարությանը նախազգուշացնելով փախստականների հոսքը դեպի երկիր կանգնեցնելու գործողությունների նախաձեռնման անհրաժեշտության մասին՝ հայտնում է AFP-ը։

«Սա արտակարգ դրություն է սահմանին»,- ասել է Թրամփը։ Նրա խոսքերով, եթե Մեքսիկան չդադարեցնի իր տարածքով փախստականների տրանզիտը, իսկ Կոնգրեսը անգործության մատնվի, սահմանը «կփակվի 100 տոկոսով»։ «Իհարկե, դա բացասաբար կանդրադառնա տնտեսության վրա»,- ասել է նա՝ հավելելով․ «Անվտանգությունն ինձ համար առեւտրից կարեւոր է»։

Թրամփը նաեւ ասել է, թե դեմոկրատներն այս հարցը կարող են «45 րոպեի ընթացքում» լուծել, սակայն քաղաքական դրդապատճառներով արգելափակում են բարեփոխումները։

Նա նշել է, թե մեքսիկացի պաշտոնյաները, արձագանքելով սահմանը փակելու իր սպառնալիքներին, անցյալ շաբաթ ճնշել են միգրանտների քարավանները։ Մեքսիկան «մեծ քայլ է արել վերջին երկու օրերի ընթացքում»՝ ասել է Թրամփը՝ հավելելով, որ նա ստիպված է շարունակել այդ գործողությունները, եթե չի ուզում, որ սահմանը փակվի։

Թրամփը նաեւ խոսել է Սալվադորին, Գվատեմալային ու Հոնդուրասին ֆինանսական օգնությունը դադարեցնելու իր որոշման մասին՝ այդ երկրներին մեղադրելով փախստականների քարավաններ կազմավորելու մեջ։