Իրանում պատժամիջոցների հարցում բացառություններ չանելու ԱՄՆ-ի որոշումն անխոհեմ են անվանել

Իրանի ԱԳՆ մամուլի քարտուղար Բահրամ Կասեմին անխոհեմ է անվանել Իրանի հարցով ԱՄՆ հատուկ ներկայացուցիչ Բրայան Հուկի հայտարարություններն այն մասին, որ Վաշինգտոնը մտադիր չէ բացառություններ անել պատժամիջոցնեևրի հարցում Իրանի հետ համագործակցության համար, հաղորդում է Tasnim-ը:

«Նրա անխոհեմ հայտարարությունները վկայում են աշխարհում վերջին իրադարձությունների ճիշտ ընկալման բացակայության, ինչպես նաեւ միջազգային մակարդակում ԱՄՆ-ի անկայուն, փխրուն, թույլ դիրքորոշման մասին», - ասել է Կասեմին:

Ավելի վաղ Հուկը հայտարարել էր, որ ԱՄՆ նախագահ Դոնալդ Թրամփի վարչակազմը մտադիր չէ պատժամիջոցների հարցում բացառություններ անել Իրանի հետ համագործակցության համար:

ԱՄՆ-ն անցյալ տարի միակողմանի դուրս էր եկել Իրանի հետ միջուկային գործարքից եւ նորից Թեհրանի դեմ պատժամիջոցներ կիրառել: Պետքարտուղար Մայք Պոմպեոն ասել էր, որ ԱՄՆ-ի նպատակն է նավթի արտահանումը Իրանից զրոյի հասցնել: Մի շարք երկրների համար (Չինաստան, Հնդկաստան, Իտալիա, Հունաստան, Ճապոնիա, Հարավային Կորեա, Թայվան եւ Թուրքիա) ԱՄՆ-ն «բացառություններ» էր արել, այսինքն, պարտավորվել էր որոշ ժամանակով որոշակի քանակությամբ իրանական նավթի գնման դեպքում պատճամիջոցներ չկիրառել: Ընթացիկ բացառությունները գործում են մինչեւ մայիս: