Որքանո՞վ է աճել պետությանը պատճառված վնասը 2018-ին եւ որ ոլորտներին է բաժին ընկել

2016 թվականին ՊԵԿ քննչական վարչությունում քննվել է 86 քրեական գործ, որով արձանագրվել է մոտ 5,45 մլրդ դրամ պետությանը պատճառված վնաս. 2017-ին եղել է 57 քրգործ, 1,83 մլրդ դրամ, իսկ 2018-ին արդեն ունենք 134 քրգործ, որով պետության պատճառված վնասի նախնական հաշվարկներով կա արդեն 23 մլրդ դրամից ավելի պատճառված վնաս: Այս մասին, այսօր՝ մարտի 11-ին, լրագրողների հետ հանդիպման ժամանակ նշեց ՊԵԿ նախագահի տեղակալ Ռուստամ Բադասյանը:

Նրա խոսքով, պետության պատճառված վնասի վերականգումների մասով պատկերը հետեւյալն է. 2016-ին՝ 4,5 մլրդ դրամ, 2017-ին՝ 8,4 մլրդ դրամ, 2018-ին՝ 8,5 մլրդ դրամ:

ՊԵԿ փոխնախագահը տեղեկացրեց, որ այդ 23 մլրդ դրամից մոտ 16 մլրդ դրամը բաժին է հասել գազալիցքավորման գործունեություն իրականացնող տնտեսվարողներին, հաջորդը շինարարական ընկերություններն են, այսպես կոչված, կարգո ընկերությունները, որոնք բեռբների ներմուծմամբ էին զբաղվում, եւ ապահովագրական ընկերությունները:

«Գազալիցքավորման գործունեություն իրականացնող տնտեսվարողների շրջանում 2018-ի մարտին շրջանառության աճը կազմում էր 6,4 տոկոս, մինչդեռ 2018-ի հունիսից բարձրանում է 20,4 տոկոս: Ծավալների առումով 39 մլրդ խմ-ից հուլիսին այն արդեն 54 մլն խմ էր:

Այսինքն ՊԵԿ-ի կողմից հունիսից սկսվել են չափագրումներ, որով հետո այդ աճն արձանագրվել է, քրգործեր են հարուցվել, եւ աճի տեմպերը շարունակվում են պահպանվել»,-ասաց Բադասյանը՝ հավելելով, որ ընդ որում, այդ ոլորտում տնտեսվարողների թիվը էական փոփոխության չի ենթարկվել, դեռ մի բան էլ աննշան նվազում է եղել, այսինքն խոսքն այս դեպքում ստվերի կրճատման մասին է:

Լուրեր Հայաստանից - NEWS.am