Վրացական թագավորական տան ժառանգորդուհին դատի է տվել իր նախկին ամուսնուն, որը նույնպես թագավորական տան ժառանգ է

Վրացական թագավորական տոհմի՝ Բագրատիոնիների երկու ճյուղերի ներկայացուցիչները Թբիլիսիի քաղաքացիական դատարանում սկսել են հարաբերությունների պարզաբանումը, հայտնում է vz.ru-ն՝ մանրամասնելով, որ 2013թ. ամուսնալուծված Աննա Բագրատիոնի-Վրաստանցին հայց է ներկայացրել նախկին ամուսնու՝ Դավիթ Բագրատիոնի-Մուխրանելիի դեմ՝ նրան մեղադրելով իրեն թագավորի անվան ներքո ներկայացնելու և այդպիսով «պատմությունը խեղաթյուրելու» համար:

Վրացական թագավորական տան ժառանգորդուհու հայցում նշվում է, որ նախկին ամուսինը, չունենալով այդ իրավունքը, արտասահմանում ճամփորդելիս իրեն որպես թագավոր է ներկայացրել ու դրանով «խեղաթյուրել է պատմությունը»:

Այժմ Աննա Բագրատիոնի-Վրաստանցին դատարանից պահանջում է Դավիթ Բագրատիոնի-Մուխրանելիին արգելել նման բան անել, ինչպես նաև պահանջում է, որ վերջինս բարոյական վնասի փոխհատուցման համար խորհրդանշական 1 լարի վճարի:

Ինչ վերաբերում է պատասխանող կողմին, ապա նրանք համաձայն չեն հայցի հետ:

Աղբյուրը մանրամասնում է, որ Աննայի և Դավիթի ամուսնության արդյունքում ծնվել է արու զավակ Գեորգին, որին Վրաստանի ուղղափառ եկեղեցին Բագրատիոնիների տոհմի ապագա ժառանգ է հռչակել: Հնգամյա տղան այժմ կրում է Մուխրանելիի արքայազնի տիտղոսը: Նրան մկրտել է Վրաստանի պատրիարք Իլյա 2-րդը:

Վրաստանում Բագրատիոնիների արքայական տոհմի կառավարումն ընդհատվել է 1801թ., երբ ռուս կայսր Ալեքսանդր 1-ինը Վրաստանի՝ Ռուսաստանին միանալու մանիֆեստ է հռչակել:

Բագրատիոնիների տոհմը ձևավորվել է 1008թ.՝ Բագրատ 3-րդ արքայից: 19-րդ դարում վրացական թագավորական ընտանիքի ներկայացուցիչները բռնի կերպով տեղափոխվել են Ռուսաստան: 1841թ. ռուսական կառավարությունը նրանց պաշտոնապես ճանաչել է «Վրաստանի նախկին թագավորական տան անդամներ»: