Նախկին պատգամավոր Սելինա Դողանի ամուսինը մահվան սպառնալիքներ է ստանում հայերի իրավունքները պաշտպանելու համար

Թուրքիայի ընդդիմադիր Ժողովրդահանրապետական կուսակցության անդամ, Մեջլիսի հայազգի նախկին պատգամավոր Սելինա Դողանի ամուսինը՝ հայտնի փաստաբան Էրդալ Դողանը, մահվան սպառնալիքներ է ստանում հայերի իրավունքները պաշտպանելու պատճառով:

Այս մասին գրում է Ստամբուլի հայկական պարբերականներից «ՀայԹերթը»:

Հայտնի է, որ փաստաբան Էրդալ Դողանը ժամանակին զբաղվել է 2007 թվականի սպանված պոլսահայ լրագրող, «Ակօս» թերթի հիմնադիր ու նախկին խմբագիր Հրանտ Դինքին վերաբերող դատական գործերով, Դինքի սպանությունից հետո հանդես է եկել նաև որպես Դինք ընտանիքի փաստաբան:

Նշենք, որ Դողանը վարել է Թուրքիայում հայերի ունեցվածքի անօրինական բռնագրավումների ու մի շարք այլ հարցերով գործեր՝ բազմիցս պաշտպանելով հայազգի քաղաքացիների իրավունքները:

Թուրքական «ArtıGerçek» կայքը տեղեկացել է, որ հայտնի փաստաբանը ոչ միայն մահվան լուրջ սպառնալիքներ է ստանում, այլև ենթարկվում է անհայտ անձանց հետապնդումներին, ինչպես և Հրանտ Դինքը սպանությունից առաջ: Օրերս Դողանի գրասենյակի մոտակայքում երևացել են մի խումբ անհայտ երիտասարդներ, որոնք փորձել են ճշտել, թե որ ժամերին է փաստաբանը գալիս այստեղ և երբ դուրս գալիս:

Նշվում է, որ գրասենյակի անվտանգության տեսախցիկները ֆիքսել են այդ անձանց դեմքերը, ձայնագրությունները Դողանն արդեն փոխանցել է ոստիկանությանը: