Անծանոթները «փրկել» են միայնակ մնացած տղայի ծննդյան տոնը

Անծանոթ մարդիկ օգնել են տղային նշել ծննդյան տոնը, քանի որ նրա դասընկերները չէին եկել մասնակցելու այդ առիթով կազմակերպված խնջույքին, հաղորդում է Yahoo News-ը:

Տասնամյա Բրոդի Բարոնի ընտանիքը Մեծ Բրիտանիայից վերջերս էր տեղափոխվել ԱՄՆ Օկլահոմա նահանգ: Բրոդին իր ծննդյան օրը սովորաբար նշում էր օգոստոսին, սակայն այս տարի որոշում են տոնել ավելի ուշ, որպեսզի նա կարողանա նոր ծանոթություններ հաստատել և ընկերներ ձեռք բերել դպրոցում:

Ընտանեկան ժամանցի կենտրոնում կազմակերպված խնջույքին հրավիրված էին Բրոդիի տաս համադասարանցիներ: «Մենք չէինք ակնկալում, որ բոլորը գան, բայց 30 րոպե անց հասկացանք, որ ոչ ոք չի լինի», – ասում է մայրը:

Տեսնելով իրավիճակը՝ կենտրոնի մենեջերը ասում է. «Մենք նրա համար անմոռանալի երեկույթ կկազմակերպենք, և դա ձեզ համար ոչ մի ցենտ չի արժենա»: Զվարճանքի կենտրոնի աշխատակիցները հավաքվում են Բրոդիի տոնական սեղանի շուրջ, երգում «Happy Birthday», նրա հետ զվարճալի խաղեր կազմակերպում և «Fortnite» խորհրդանիշով կեգլի նվիրում:

«Բրոդին բոլորի ուշադրության կենտրոնում էր և ասաց, որ դա անմոռանալի օր էր իր համար», – ասել է մայրը: