Ուսեյն Բոլթը մերժել է ավստրալական ֆուտբոլային ակումբին

100 եւ 200 մետր վազքի աշխարհի ռեկորդակիր, վազորդի կարիերան ավարտած Ուսեյն Բոլթը չի ընդունել ավստրալական «Սենթրալ Քոսթ Մարիներս» ֆուտբոլային ակումբի առաջարկը՝ կնքել պրոֆեսիոնալ պայմանագիր տարեկան 150 հազար դոլար վարձատրությամբ: Ջամայկացի մարզիկը հրաժարվել է, քանի որ ակնկալել է տարեկան 3 միլիոն դոլար վարձատրություն, հաղորդում է Fox Sports-ը:

Հիշեցնենք, որ հոկտեմբերի 12-ին կայացած «Մաքարտուր Վեստ Քոսթ Յունայթեդի» դեմ Ավստրալիայի առաջնության նախամրցաշրջանային խաղում ջամայկացի նախկին արագավազորդը դարձել էր դուբլի հեղինակ: 57-րդ րոպեին Բոլթն առաջին գոլն էր խփել պրոֆեսիոնալ ֆուտբոլում, իսկ 11 րոպե անց աչքի է ընկել եւս մեկ անգամ: «Սենթրալ Քոսթ Մարիներսը» հաղթել էր 4:0 հաշվով, իսկ նախկին աթլետն առաջին անգամ հանդես էր եկել մեկնարկային կազմում: