Ոչ մի պրոբլեմ չկա, եթե ԱԺ-ն չհասցնի ընդունել 2019-ի պետական բյուջեն. Փաշինյան

Ոչ մի պրոբլեմ չկա, եթե ԱԺ-ն չհասցնի ընդունել 2019 թվականի պետական բյուջեն: Այս մասին, այսօր՝ հոկտեմբերի 17-ին, լրագրողների հետ զրույցում նշեց ՀՀ վարչապետի պաշտոնակատար Նիկոլ Փաշինյանը:

NEWS.am-ի հարցին, թե հնարավո՞ր է, որ խորհրդարանը չհասցնի քննարկել եւ ընդունել հաջորդ տարվա պետական բյուջեի նախագիծը, Նիկոլ Փաշինյանն արձագանքեց. «Օրենքը նախատեսում է այդպիսի դեպքեր եւ եթե չհասցնենք, ոչ մի պրոբլեմ չկա»:

Նշենք, որ Սահմանադրության համաձայն՝ եթե հաջորդ տարվա բյուջեի նախագիծը չի ընդունվում, ապա գործում է նախորդ տարվա համամասնություններով, իսկ դա նշանակում է, որ սոցիալական ծախսերը, այդ թվում որոշ ոլորտներում աշխատավարձերի բարձրացումները, որոնք նախատեսված են 2019 թվականի բյուջեով, չեն կատարվի մինչեւ բյուջեի ընդունումը:

Նշենք, որ ԱԺ-ում 2019-ի բյուջեի նախագծի քննարկումները նշանակված են հոկտեմբերի 29-ից. ԱԺ հանձնաժողովներում մոտ 15 օր է նախատեսված, ապա պետք է քննարկվի նոյեմբերի 14-ին գումարվող ԱԺ նստաշրջանի ժամանակ: Սակայն ԱԺ-ն ամենայն հավանականությամբ 14 օր անց ցրվելու է: