Ալաշկերտ ֆուտբոլային ակումբը նոր գլխավոր մարզիչ ունի

Ձևավորվել է «Ալաշկերտի» նոր մարզչական շտաբը, հայտնում է ակումբի մամուլի քարտուղարությունը: 

«Ալաշկերտի» գլխավոր մարզիչ է նշանակվել Արամ Ոսկանյանը, ով 2016-2017 թթ. աշխատել է երևանյան ակումբում: 

Վերջին շրջանում 43-ամյա մասնագետը գլխավորում էր Երևանի «Բանանցը», որը նրա գլխավորությամբ նախորդ մրցաշրջանում դարձել է Հայաստանի փոխչեմպիոն: 

Մինչ այդ Արամ Ոսկանյանը գլխավորել է Երևանի «Միկան», Հայաստանի Մ-19 հավաքականը: 

Գլխավոր մարզիչի առաջին օգնական է նշանակվել Անդրանիկ Բաբայանը: 42-ամյա մասնագետը հանդես է եկել մի շարք ռուսական ակումբներում, 2008-2018 թթ. աշխատել է ռուսական «Վոլգարում», իսկ այս մրցաշրջանի նախապատրաստական փուլում գլխավորում էր «Արարատ-Արմենիան»: 

«Ալաշկերտի» մարզչական շտաբում ընգրկվել են նաև ֆիզպատրաստության մարզիչ Մանուկ Սարգսյանը և դարպասապահների մարզիչ Արմեն Կիրակոսյանը:

Նշենք, որ այսօր «Ալաշկերտն» առաջին մարզումն է անցկացրել Արամ Ոսկանյանի գլխավորությամբ: