Արազ Օզբիլիսը կխաղա Հոլանդիայի առաջնությունում

Ինչպես արդեն տեղեկացրել ենք, Հայաստանի ազգային հավաքականի կիսապաշտպան Արազ Օզբիլիսը, ում տրանսֆերային իրավունքները պատկանում են «Բեշիքթաշին», կարիերան շարունակելու է հոլանդական «Վիլլեմ II» ակումբում:

Հոլանդական ակումբը հաստատել է հայ ֆուտբոլիստի տեղափոխության լուրը, սակայն գործարքի մանրամասները դեռ չեն հրապարակվել:

Bd.nl կայքից տեղեկանում ենք, որ Օզբիլիսն արդեն միացել է «Վիլլեմ II»-ին և այսօր մարզվել է նոր թիմի կազմում: Մարզման տեսանյութը կարող եք դիտել այստեղ:

Նույն լրատվամիջոցի հետ զրույցում «Վիլլեմ II»-ի գլխավոր մարզիչ Ադրի Կոստերը գովաբանել է հայ ֆուտբոլիստին.

«Օզբիլիսը «Բեշիքթաշի» կազմում նախապատրաստվել է նոր մրցաշրջանին, այնպես որ՝ զարմանալի չէ, որ մարզմանը նա լավ տպավորություն թողեց: Արազը հենց այն ֆուտբոլիստն է, ով մեզ անհրաժեշտ է: Նա կարող է խաղալ առջևի գծի ցանկացած դիրքում, կարող է գոլեր խփել: Նա փորձառու խաղացող է»,- ասել է Կոստերը:

Հոլանդիայի առաջնության առաջին տուրում Օզբիլիսի թիմն առաջին խաղը կանցկացնի օգոստոսի 11-ին մրցելով ՎՎՎ-Վենլո թիմի հետ:

Top-News.am