Օզիլը մեկնաբանել է Էրդողանի հետ աղմկահարույց լուսանկարը

Գերմանիայի ազգային հավաքականի արդեն նախկին խաղացող, թուրքական ծագմամբ Մեսութ Օզիլը մեկնաբանել է շաբաթներ առաջ իր և Թուրքիայի նախագահ Ռեջեփ Թայիփ Էրդողանի համատեղ լուսանկարը, որի համար լուրջ քննադատությունների էր ենթարկվել։

Ինչպես գրում է թուրքական «Սյոզջու» պարբերականը, Օզիլը նշել է, որ Էրդողանի հետ հանդիպումը քաղաքական բնույթ չի կրել և չի պարունակել նախընտրական քարոզչության տարրեր։

«Դա քաղաքականության կամ ընտրությունների հետ կապ չունի, դա ուղղակի հարգանքի դրսևորում է այն երկրի բարձրագույն ղեկավարության հանդեպ, որին պատկանում է իմ ընտանիքը»,- ասել է Օզիլը։

Ըստ ֆուտբոլիստի՝ Էրդողանի հետ հանդիպման ժամանակ իրենք քաղաքական հարցեր առհասարակ չեն քննարկել, և խոսակցության հիմնական թեման եղել է հենց ֆուտբոլը։

Նախօրեին հայտնի է դարձել, որ Օզիլը լքում է Գերմանիայի ազգային հավաքականը։ Խոսելով իր այդ որոշման մասին՝ նա ասել է․ «Երբ հաղթում եմ՝ գերմանացի եմ, երբ պարտվում՝ ներգաղթյալ»։