Թբիլիսիում վերսկսվել են խորհրդարանի մոտ տեղի ունեցող բողոքի ցույցերը

Թբիլիսիի կենտրոնում վերսկսվել են բողոքի ակցիաները՝ կապված մեծ հնչեղություն ստացած սպանության գործի հետ, որը տեղի է ունեցել անցյալ տարվա դեկտեմբերին:

Ինչպես փոխանցում է РИА Новости-ն, Վրաստանի խորհրդարանի մոտ անցկացվող բողոքի ցույցերն արդեն երրորդ օրն է, ինչ շարունակվում են: Հանրահավաքի կազմակերպիչ Զազա Սարալիձեն պնդում է, որ բողոքի ակցիաները չեն դադարեցվելու, քանի դեռ իր որդու մարդասպանը չի բացահայտվել և չի պատժվել: Նա պահանջում է «վերջ դնել անարադարության համակարգին, որի գլխին կանգնած է կառավարությունը»: Ցուցարարները պահանջում են կառավարության հրաժարականը:

Ռուսթավելի պողոտայում, որտեղ գտնվում է կառավարության շենքը, երթևեկությունը դեռևս փակ չէ: Անձրևի պատճառով ցուցարարների թիվն այնքան էլ մեծ չէ:

Հիշեցնենք, որ ցույցերի առաջին օրը՝ բողոքների ֆոնին հրաժարական է ներկայացրել երկրի գլխավոր դատախազ Իրակլի Շոթաձեն:

 Ցուցարարների զայրույթը նոր թափ է ստացել, երբ դատարանն ազատ է արձակել մեղադրյալներից մեկին, իսկ մյուսի մեղադրանքը մեղամացրել է: Դատավարություն է ընթանում 2017-ի դեկտեմբերին Թբիլիսիում երկու դեռահասի սպանության գործով, որոնց դանակահարել էին դպրոցականների միջև ծագած զանգվածային ծեծկռտուքի ժամանակ: