Էրդողան․ «Սպասում ենք այն օրվան, երբ Հայաստանի ղեկավարությունը ողջամտություն կցուցաբերի»

Պաշտոնական այցով Լոնդոնում գտնվող Թուրքիայի նախագահ Ռեջեփ Էրդողանը, Chatham House միջազգային հարաբերությունների թագավորական ինստիտուտում ելույթի ժամանակ խոսելով Թուրքիայի արտաքին քաղաքականության հիմնական ուղղությունների և միջազգային օրակարգին առնչվող մի շարք հարցերի մասին, անդրադարձել է նաև հարևան երկրի՝ Հայաստանի հետ հարաբերություններին:

«Թուրքիան սատարում է Կովկասում և Միջին Ասիայում մնայուն խաղաղությանը, զարգացմանն ու բարօրությանը ուղղված բոլոր ջանքերը: Այս դրական պատկերից դուրս մնացած միակ երկիրը Հայաստանն է: Մենք սպասում ենք այն օրվան, երբ Հայաստանի ղեկավարությունը խելամիտ մոտեցում և ողջամտություն կցուցաբերի», - Anadolu գործակալության փոխանցմամբ` հայտարարել է Էրդողանը:

Ավելի վաղ, հիշեցնենք, Թուրքիայի վարչապետ Բինալի Յըլդըրըմը, խոսելով երկկող հայ-թուրքական հարաբերությունների ապագայի մասին, հայտարարել էր, թե Թուրքիան պատրաստ է ընդառաջ գնալ, «եթե Հայաստանը հրաժարվի տարիներ շարունակ Թուրքիայի նկատմամբ իր թշնամական վերաբերմունքից, Թուրքիայի տարածքային ամբողջականությանը, սահմաններին ուղղված սխալ մոտեցումներից և ցանկանա նոր էջ բացել»: