Թուրքիան պետք է սկսի ինքնակառավարվող տանկեր արտադրել. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ առաջիկայում պատրաստվում են ինքնակառավարվող տանկեր արտադրել, այս մասին գրում է թուրքական «Սաբահ» պարբերականը:

«Մենք պետք է ինքներս արտադրենք հեռակառավարվող տանկեր: Մենք կանենք դա։ Եթե մենք ինչ-որ մեկից կախում ունենայինք՝ չէինք կարողանա հասնել այս կետին»,- հայտարարել է Էրդողանը՝ շեշտելով, որ այժմ սիրիական Աֆրինում ռազմական գործողության շրջանակում օգտագործվող զինտեխնիկայի 65 տոկոսը թուրքական արտադրության է:

Էրդողանը նշել է, որ հեռակառավարվող տանկերը կարևոր են իրենց համար այն առումով, որ կօգնեն նվազեցնել թուրքական ԶՈւ-ի կորուստները։

Հիշեցնենք, որ հունվարի 20-ին թուրքական ԶՈւ-ն սկսել է Սիրիայի հյուսիսում գտնվող քրդական ազգային զինված ջոկատների (PYD/YPG) դեմ ռազմական գործողությունը, որը ստացել է «Ձիթենու ճյուղ» անվանումը:

Օդային առաջին հարձակումներից հետո, հունվարի 21-ին թուրքական ԶՈւ-ի զինվորականներն անցել են լայնամասշտաբ հարձակման նաև ցամաքում: Հայտնի է, որ թուրքական ԶՈւ-ին աջակցում է «Սիրիական ազատ բանակ» ընդդիմադիր խմբավորումը՝ ինչպես 2016թ.-ին ձեռնարկված «Եփրատի վահան» գործողության ժամանակ