Ադրբեջանցիներին վրդովվեցրել է Արցախի անունը կրող ապրանքների վաճառքը ռուսաստանյան շուկայում

Ադրբեջանական մամուլին և Մոսկվայի ադրբեջանական համայնքի ներկայացուցիչներին կրկին անհանգստացրել է Արցախի անունը կրող ապրանքի վաճառքը ռուսաստանյան շուկայում: Ինչպես գրում է ադրբեջանական ԱՊԱ գործակալությունը, այս անգամ ադրբեջանցիները Մոսկվայի առևտրի կենտրոններից մեկում նկատել են «Արցախ» անունը կրող ալկոհոլային խմիչք:

Հայտնի է, որ խմիչքն արտադրվել է Artsakh Brandy Company ընկերության կողմից, իսկ որպես արտադրության վայր պիտակի վրա նշված է Հայաստանի Հանրապետության Այգեստան գյուղը:

Նշենք, որ Այգեստանն Արցախի Մայրաբերդի շրջանի գյուղերից է:

Հիշեցնենք, որ ավելի վաղ մի խումբ ադրբեջանցիներ սկանդալ էին սարքել Մոսկվայի սուպերմարկետներից մեկում՝ պահանջելով վաճառվող ապրանքների շարքից վերացնել Արցախում արտադրված թթի դոշաբը:

Այդ ժամանակ խանութի ղեկավարները դիմել են փաստաբանների, որոնք Ռուսաստանի օրենսդրության և ոչ մի կետի խախտում չեն արձանագրել: