Ալիևի նախկին փեսային քննադատել են հայկական արմատներով երգչին Բաքու հրավիրելու համար

Մոսկվաբնակ հայտնի ադրբեջանցի գործարար, երգիչ, Ադրբեջանի նախագահի նախկին փեսա Էմին Աղալարովը հայտնվել է ադրբեջանական լրատվամիջոցների քննադատության թիրախում, քանի որ Բաքվում կայանալիք «Ժառա-2018» («Жара-2018») փառատոնին հրավիրել է հայկական արմատներով երգիչ Ալեքսեյ Չումակովին, գրում է rusarminfo.ru-ն՝ ադրբեջանական լրատվամիջոցներին հղումով:

Նախկինում Չումակովը պատմել էր, որ մոր նախնիները Լեռնային Ղարաբաղից են, բայց ինքն ու մայրը ծնվել են ուզբեկական Սամարղանդ քաղաքում: Նշվում է, որ սիրված կատարողը բազմիցս խոսել է հայկական արմատների մասին:

«Եվ ահա այժմ Էմին Աղալարովը Չումակովին Բաքու է հրավիրում»,-գրել է haqqin.az-ը:

Աղբյուրը նաև հիշեցրել է 2016թ. հայտնի վրացի երգիչ Սոսո Պավլիաշվիլիի այցի մասին: Այն ժամանակ Աղալարովին հաջողվել էր այնպես անել, որ Ադրբեջանի արտգործնախարարության «սև ցուցակում» հայտնված Պավլիաշվիլիի բարեգործական համերգը Բաքվում այնուամենայնիվ կայանա:

Հայտնի է, որ Պավլիաշվիլին «սև ցուցակում» էր հայտնվել 2004թ. Արցախում համերգ տալու պատճառով: