Մեծ Բրիտանիան մշակում է ցամաքային փրկարարական ծրագիր Պարսից ծոցի երկրներում արգելափակված բրիտանացիների համար

Մեծ Բրիտանիան մշակում է ցամաքային փրկարարական ծրագիր Պարսից ծոցի երկրներում արգելափակված 94,000 բրիտանացիների համար, հայտնում է Daily mail-ը։ Մինչ Մեծ Բրիտանիայի վարչապետը թույլատրում է ԱՄՆ զորքերին օգտագործել բրիտանական բազաները Իրանին հարվածելու համար, նախարարները նախապատրաստվում են զբոսաշրջիկների և էմիգրանտների զանգվածային տարհանմանը Սաուդյան Արաբիայի տարածքով:

Թեհրանի ուղղությամբ ԱՄՆ-ի օդային հարվածներից և զբոսաշրջային վայրերի (այդ թվում՝ Դուբայի) դեմ Իրանի պատասխան «մահապարտ-դրոնների» հարձակումներից հետո, 94,000 բրիտանացի քաղաքացիներ գրանցել են իրենց կոնտակտային տվյալները Արտաքին գործերի նախարարությունում. նրանցից շատերը տարածաշրջան այցելած կամ տարանցիկ անցնող զբոսաշրջիկներ են:

Սա տեղի ունեցավ այն բանից հետո, երբ Կիր Սթարմերը համաձայնեց ԱՄՆ-ի խնդրանքին՝ օգտագործել բրիտանական ռազմական բազաները իրանական հրթիռային կայաններին հարվածելու համար: «Պարսից ծոցի մեր գործընկերները խնդրել են մեզ ավելին անել իրենց պաշտպանելու համար, և իմ պարտքն է պաշտպանել բրիտանացիների կյանքը: Սա համապատասխանում է միջազգային իրավունքին, և մենք հրապարակում ենք մեր իրավական խորհրդատվության ամփոփագիրը»,- ասել է վարչապետը։

Քանի որ 94,000 մարդ արդեն գրանցվել է Արտաքին գործերի նախարարությունում, ակնկալվում է, որ հարյուր հազարավորները կհետևեն նրանց օրինակին: Հասկանալի է, որ նախարարները մշակում են արտակարգ իրավիճակների ծրագրեր՝ նրանց ԱՄԷ-ից, Բահրեյնից, Քուվեյթից և Կատարից ցամաքային ճանապարհով դեպի Սաուդյան Արաբիա տարհանելու համար: