Հայ–լեհական երկկողմ օրակարգ և եվրոպական հեռանկարներ

ՀՀ վարչապետ Նիկոլ Փաշինյանն այսօր երկօրյա պաշտոնական այցով մեկնել է Լեհաստան։ Այցը տեղի է ունենում հայ-լեհական հարաբերությունների ակտիվացման և Հայաստանի արտաքին քաղաքական բազմավեկտոր՝ բալանսավորված և բալանսավորման օրակարգի համատեքստում։

Վարչապետի այցը կարևոր փուլ է Լեհաստանի հետ հարաբերությունների զարգացման և Հայաստանի՝ եվրոպական քաղաքական ուղղության ամրապնդման գործընթացում։ Լեհաստանը ոչ միայն ԵՄ-ում ազդեցիկ ձայն, այլև ակտիվ դիրքորոշում ունի Արևելյան գործընկերության քաղաքականության շրջանակում։

Այս պահին Նիկոլ Փաշինյանի՝ Լեհաստան երկօրյա պաշտոնական այցի ամբողջական օրակարգը պաշտոնապես դեռ չի հրապարակվել։ Կառավարության հաղորդագրության համաձայն՝ նախատեսված են հանդիպումներ Լեհաստանի բարձրագույն ղեկավարության հետ։ Առանցքայինը Լեհաստանի վարչապետ Դոնալդ Տուսկի հետ հանդիպումն է։ Բանակցություններից հետո Տուսկն ու Փաշինյանը բանակցությունների արդյունքները կամփոփեն համատեղ հայտարարությամբ։

Ավելի վաղ ՀՀ վարչապետի մամուլի քարտուղար Նազելի Բաղդասարյանը սոցցանցում տեղեկացրել էր, որ Լեհաստան երկօրյա պաշտոնական այցի շրջանակներում նախատեսված են նաև Հայաստանի վարչապետի հանդիպումները այդ երկրի նախագահ Կարոլ Նավրոցկիի և սենատի նախագահ Մալգոժատա Կիդավա Բլոնսկայայի հետ: Բացի այդ, Նիկոլ Փաշինյանը կայցելի նաև միջազգային հարաբերությունների լեհական ինստիտուտ, որտեղ հանդիպում կունենա լեհ վերլուծաբանների հետ։