Ադրբեջանի օդային տարածքը չի օգտագործվի Իրանի դեմ հարվածների համար․ Բայրամով

Հեռախոսազրույց է տեղի ունեցել Ադրբեջանի և Իրանի արտաքին գործերի նախարարներ Ջեյհուն Բայրամովի և Աբբաս Արաղչիի միջև։ Այս մասին հայտնել է Ադրբեջանի արտաքին գործերի նախարարությունը։

Հեռախոսազրույցի ընթացքում քննարկվել է Իրանի շուրջ ստեղծված իրավիճակը։ Բայրամովը նշել է, որ տարածաշրջանում աճող լարվածությունը մտահոգության տեղիք է տալիս և ընդգծել, որ ադրբեջանական կողմը միշտ ընդգծել է այն քայլերից և հռետորաբանությունից զերծ մնալու անհրաժեշտությունը, որոնք կարող են անկայունություն առաջացնել Իրանում և նրա շուրջը։

Նշվել է, որ առկա խնդիրները պետք է լուծվեն բացառապես երկխոսության և դիվանագիտական ​​միջոցներով՝ միջազգային իրավունքի նորմերին և սկզբունքներին համապատասխան։

«Հատկապես ընդգծվել է, որ Ադրբեջանը երբեք թույլ չի տա, որ իր օդային տարածքը կամ տարածքը որևէ պետության կողմից օգտագործվի հարևան Իրանի կամ որևէ այլ երկրի դեմ ռազմական գործողություններ իրականացնելու համար»,- հայտարարել է Ադրբեջանի արտգործնախարարը։

Զրույցի ընթացքում մտքերի փոխանակում է տեղի ունեցել նաև երկկողմ և տարածաշրջանային այլ հարցերի շուրջ։