Հայտարարություններն այն մասին, որ Հայաստանի վարչապետի աշխատավարձը պետք է 1 դրամ կազմի, վտանգավոր են. Արթուր Հովհաննիսյան

Ընդդիմության ներկայացուցիչների հայտարարություններն այն մասին, որ Հայաստանի վարչապետի աշխատավարձը պետք է 1 դրամ կազմի, վտանգավոր են։ Այս մասին հունվարի 22-ին Ազգային ժողովում տեղի ունեցած ավանդական ճեպազրույցների ժամանակ հայտարարել է իշխող «Քաղաքացիական պայմանագիր» խմբակցության քարտուղար Արթուր Հովհաննիսյանը՝ ի պատասխան «Մեր ձևով» շարժման համակարգող Նարեկ Կարապետյանի հայտարարությունները մեկնաբանելու խնդրանքին։

«Սա պետություն է և պետական կառավարման համակարգում անհրաժեշտ են լավ մասնագետներ, որոնք պետք է վարձատրվեն իրենց կատարած աշխատանքի համար և պետությանը մատուցեն բարձրորակ, լավ ծառայություն, զերծ կոռուպցիոն և այլ մեխանիզմներից: Եթե կա մարդ, ով պատրաստ է որպես վարչապետ աշխատել, նման ծանր և պատասխանատու աշխատանք կատարել մեկ դրամով, հարցեր են առաջանում, թե այդ մարդու կարիքներն ո՞վ է հոգալու», - բացատրել է Հովհաննիսյանը։