Եվրախորհրդարանը հավանություն է տվել Ուկրաինային ԵՄ-ի կողմից տրամադրվող վարկի հրատապ քննարկմանը

Եվրախորհրդարանը հավանություն է տվել 2026-2027 թվականների համար Ուկրաինային Եվրամիության 90 միլիարդ եվրոյի չափով վարկ տրամադրելու երեք օրինագծի հրատապ քննարկմանը։ Քվեարկությունը տեղի է ունեցել երեքշաբթի՝ հունվարի 20-ին, Ստրասբուրգում։

Առաջին օրինագիծը՝ «Ուժեղացված համագործակցությունը Ուկրաինային վարկերի տրամադրման հարցում», ներկայացնում է Եվրախորհրդարանի պաշտոնական համաձայնությունը՝ արագացնելու աշխատանքը Եվրոպական խորհրդի 2025 թվականի վերջին ընդունված որոշման վրա և ամրապնդելու համագործակցությունը 24 անդամ երկրների միջև՝ Ուկրաինային վարկ տրամադրելու ԵՄ համապատասխան օրենսդրական դրույթների շրջանակներում։

Այս փաստաթղթի էության վերաբերյալ քվեարկությունը տեղի կունենա չորեքշաբթի օրը՝ հունվարի 21-ին։

Երկու այլ օրինագծեր՝ «Ուկրաինայի համար 2026 և 2027 թվականներին վարկ տրամադրելու հարցում ուժեղացված համագործակցության իրականացման կանոնակարգ» և «Ուկրաինայի համար հիմնադրամ ստեղծելու մասին 2024/792 կանոնակարգում փոփոխություններ կատարելու մասին», վերաբերում են վարկի չափին, վճարման պայմաններին, դրա ֆինանսական մեխանիզմներին և գործիքներին, ինչպես նաև Ուկրաինայի պարտավորություններին։

Քանի որ այս երկու փաստաթղթերը պահանջում են քննարկում համապատասխան հանձնաժողովներում, հնարավոր փոփոխությունները և ԵՄ Խորհրդի կողմից հաստատումը, դրանց վերջնական քվեարկությունը տեղի կունենա Եվրախորհրդարանի հաջորդ նստաշրջանում, որը նախատեսվում է անցկացնել փետրվարի 9-ից 12-ը։

Քանի որ Եվրախորհրդարանը պաշտոնապես սկսել է Ուկրաինային վարկ տրամադրելու գործընթացը, այժմ բոլոր մանրամասները պետք է համաձայնեցվեն համապատասխան հանձնաժողովների և ԵՄ խորհրդի անդամների կողմից՝ բնականոն օրենսդրական ընթացակարգի համաձայն: