Եթե լուրջ պատճառ չլիներ, Հայկ Սարգսյանին ՔՊ ցուցակից չէինք հանի. պատճառը ես չեմ. Ալեն Սիմոնյան

Ինքը գիտի՝ ինչու ենք մերժել իր բողոքը: Ցավում եմ, որ ասում է, թե պարզաբանում չի ներկայացվել իրեն: Իրեն, ինչպես մնացածին, շատ մանրամասն ներկայացվել է պատճառը: Ասեմ ավելին՝ մնացածին այդպես մանրամասն չի ներկայացվել, ինչպես իրեն, որպես գործընկեր: Այս մասին Ազգային ժողովում, լրագրողների հետ ճեպազրույցում ասել է ԱԺ նախագահ Ալեն Սիմոնյանը: 

Հարցին՝ այդքան լու՞րջ էր պատճառը, Սիմոնյանն ասել է՝ չեմ պատրաստվում գնահատական տալ, եթե լուրջ չլիներ, դրա առիթը չլիներ, նման որոշում չէր կայացվի:

ԱԺ նախագահն ընդգծել է, որ այն խոսակցությունները, թե իբր իր և Սարգսյանի մեջ խնդիր կա՝ ճիշտ չեն: «Ես հասկանում եմ, որ ով, երբ, որտեղ, ինչ հարցնում է՝ փորձում է իմ հետ կապված ինչ-որ խնդիր գտնել, ինքն էլ, ցավոք, չի ասում, որ չէ՛, դա չէ խնդիրը: Հույս ունեմ՝ կնայի այս հարցազրույցը: Ես չէի կարող այդ պատճառը լինել, և ընդհանրապես ես չեմ պատճառը»,-նշել է նա, հավելելով՝ իրեն հարցրեք, եթե կուզենա մեկնաբանել՝ կմեկնաբանի, ես մեկնաբանություն չեմ անելու:

Ալեն Սիմոնյանը, լրագրողի հարցին ի պատասխան ասաց, որ ինքը և Հայկ Սարգսյանը բացարձակապես շփում չունեն: 

Հիշեցնենք, որ ավելի վաղ Հայկ Սարգսյանը  ճեպազրույցի ժամանակ ասել էր՝ ես դիմել եմ սահմանված կարգով՝ որպես «Քաղաքացիական պայմանագիր» կուսակցության անդամ, որպեսզի ինձ հնարավորություն ընձեռնվի ընգրկվել ցուցակի նախնական ընտրության կազմում: 

«Ինձ որևէ հիմնավորում չներկայացնելով` «Քաղաքացիական Պայմանագիր» կուսակցությունը մերժել է: Սահմանված կարգով բողոքարկել եմ վարչության որոշումը, ինձ հրավիրել են վարչության նիստի, և որևէ ընդունելի պատճառաբանություն չի ներկայացվել: Իմ դիմումը մերժվել է»,-նշել էր նա: