Երևանի դպրոցներում հեռախոսների արգելք՝  ինչպե՞ս է այն գործում

Արդեն տևական ժամանակ է անցել, ինչ Երևանի քաղաքապետարանի որոշմամբ քաղաքապետարանի ենթակայությամբ գործող  դպրոցներում արգելվում է աշակերտների կողմից հեռախոսների օգտագործումը։

Փորձեցինք պարզել, թե դպրոցներում ինչպես է գործում որոշումը, և արդյոք խնդիրներ չեն առաջանում՝ նաև  հաշվի առնելով, որ վերջին շրջանում շատ դասագրքերում զետեղված են QR կոդերով դասանյութեր։

Երևանի քաղաքապետարանի աշխատակազմի հանրակրթության վարչության պետ Մարգարիտ Խաչատրյանի խոսքով դպրոցներում հեռախոսի արգելման պրակտիկան այնքան էլ  նոր չէ, և որոշ դպրոցներում կիրառվում էր ավելի վաղ ժամանակներից։ Սակայն որոշման ընդունման փոփոխությունը միասնական մոտեցում ցուցաբերելու մեջ է կայանում։ Քաղաքապետարանից դպրոցներին առաջարկել են նաև ամրագրել պայմանները և կանոնները դպրոցների ներքին կարգապահական կանոններում։

Նաև հատուկ որոշմամբ դպրոցների ուսուցիչները և տնօրենները ունեն հիմնավորում, թե ինչու պետք է թույլ չտան հեռախոսների օգտագործում դասապրոցեսի ընթացքում։

Մարգարիտ Խաչատրյանի տվյալներով ներկայումս քաղաքապետարանի ենթակայության տակ գտնվող 151 դպրոցներից 143-ում արդեն իսկ ներքին կարգապահական կանոններում պայմանները  ամրագրված են։

Մեր հարցին, թե չկա՞ն արդյոք դժգոհություններ հեռախոսների արգելքի որոշումից, պաշտոնյան պատասխանեց թե դժգոհություններ չեն ստացել, «բնականաբար երեխաները շատ ուրախ չեն կարող լինել։ Որովհետև առանձին դեպքերում դա իրենց խաղալիքն է, ընկերների հետ շփման միջոցն է, բայց որևէ  դժգոհություն որևէ ծնողի կողմից չենք ստացել»,- ընդծեց նա։ Ըստ Խաչատրյանի ընդհակառակը՝ իրենք հիմնականում ստացել են գոհունակություն ուսուցիչների և տնօրենների կողմից։

Պաշտոնյայի պնդմամբ հեռախոսների կիրառման արգելքը չի կարող խոչընդոտել դասագրքերում առկա QR կոդից օգտվել, կամ համացանցից  ինֆորմացիա ստանալու համար, եթե դա ուսուցչի հանձնարարությունն է՝ «եթե հեռախոս օգտագործելու անհրաժեշտություն կա՝ կարող են օգտագործել, ուղղակի ուսուցչի հրահանգով և վերահսկողությամբ»։ 

Մարգարիտ Խաչատրյանը դրական է գնահատում դպրոցներում հեռախոսների արգելման որոշումը, և հավելում՝ հետևողական են լինելու, որ դպրոցները ապահովեն որոշման կիրառումը իրենց հնարավորությունների սահմանում։

Զրուցեցինք նաև Երաևնյան մի քանի դպրոցների տնօրենների հետ, որտեղ հեռախոսների կիրառման արգելքը գործում էր նախքան  քաղաքապետարանի որոշումը։ 

Դպրոցներից մեկում արդեն նախորդ տարվանից գործում էր դասերի ժամանակ հեռախոսներ ունենալու արգելքը։ Տնօրենը գոհունակությամբ  և ուրախությամբ էր նշում, որ դպրոցի ծնողական խորհուրդը բավականին ակտիվ է՝ «իրենք են առաջարկել՝ մենք էլ մեր համաձայնությունը տվել ենք, որովհետև շատ ուսուցիչներ բողոքում էին»։ 

Տնօրենի պնդմամբ, երեխաների ձեռքին հեռախոսի առկայությունը կախվածություն է առաջացնում  «ամեն րոպե ուզում են բացեն, նայեն։ Դրանով խափանվում է դասապրոցեսը»։ 

Տնօրենը ընդգծում է, որ լսողական վարժությունների պարագայում, երբ կարիք կա օգտվելու QR  կոդից,   միացնում են ուսուցչի հեռախոսով, և բոլոր աշակերտները հնարավորություն են ունենում լսել առանց իրենց հեռախոսի օգտագործման՝ ուսուցիչները նույնպես գոհ են, որ իրենց դասապրոցեսը չի խանգարվում։ 

TOP-NEWS.AM