ՀՀ նախագահը մասնակցել է Հայաստանում առաջին Աղոթքի նախաճաշի միջոցառմանը
Հանրապետության նախագահ Վահագն Խաչատուրյանը մասնակցել է Հայաստանում առաջին Աղոթքի նախաճաշի միջոցառման մեկնարկին և հանդես եկել համաժողովի բացման խոսքով:
ՀՀ նախագահի բացման խոսքը Հայաստանում առաջին Աղոթքի նախաճաշի միջոցառմանը.
«Սրտանց ողջունում եմ բոլորիդ Հայաստանի Հանրապետությունում մեկնարկած համաժողովի առիթով։
Այս նախաձեռնությունը կարևոր և խորհրդանշական իրադարձություն է, որը միավորում է քաղաքական, դիվանագիտական, տնտեսական, հասարակական և հոգևոր կյանքի ներկայացուցիչներին։ Այն վկայում է, որ պետության ամրությունը չափվում է ոչ միայն տնտեսական կամ ռազմական ցուցանիշներով, այլև բարոյական և հոգևոր հիմքերով։
Հայաստանը՝ որպես աշխարհի առաջին քրիստոնյա պետություն, իր պատմության ընթացքում միշտ ուժ է գտել հավատից և արժեքներից։ Դժվարին ժամանակներում մեզ պահպանել է ոչ միայն մեր խիզախությունը, այլև համոզմունքը, որ պետությունը կայուն է այնքանով, որքանով որ կայուն են նրա արժեքային հիմքերը՝ մարդուն, արդարությանը, ազատությանը և պատասխանատվությանը նվիրված գաղափարները։
Այսօր, երբ մեր տարածաշրջանը կանգնած է նոր հնարավորությունների ու խաղաղության ճանապարհի վրա, կարևոր է, որ այդ ուղին կառուցենք ոչ թե ուժի կամ պարտադրանքի, այլ՝ հարգանքի, վստահության և համընդհանուր բարոյական սկզբունքների վրա։
Այսպիսի հարթակները՝ աղոթքի, խորհելու և բաց երկխոսության, ունեն առանձնահատուկ նշանակություն։ Դրանք հիշեցնում են, որ տարբեր կարծիքներն ու հավատամքները կարող են միավորվել ընդհանուր նպատակի շուրջ՝ հանուն համերաշխության և խաղաղ ապագայի։
Հոգևոր և աշխարհիկ սկզբունքների ներդաշնակությունն այն հիմքն է, որի վրա կարելի է կառուցել ժամանակակից, ժողովրդավարական ու վստահելի պետություն։ Ժողովրդավարությունը կենսունակ է միայն այն ժամանակ, երբ ազատությունը ուղեկցվում է պատասխանատվությամբ, իշխանությունը՝ ծառայության գիտակցությամբ, իսկ օրենքը՝ բարոյական հիմքով։
Այսօր ուզում եմ առանձնահատուկ շնորհակալություն հայտնել այս նախաձեռնության հեղինակներին՝ ձեր աշխատանքի և նվիրումի համար։ Այս ձևաչափը հիշեցում է, որ պետության և հասարակության միջև գոյություն ունի ոչ միայն քաղաքական, այլև բարոյական կապ՝ հիմնված փոխադարձ հարգանքի և վստահության վրա։
Թող այս միջոցառումը դառնա նոր սկիզբ՝ մեր ժողովրդի միասնության, բարոյական նորացման և հավատով առաջնորդվող համերաշխության ու արժանապատիվ խաղաղության ճանապարհին։
Շնորհակալություն եմ հայտնում բոլոր կազմակերպիչներին և մասնակիցներին՝ ձեր մասնակցության ու գաղափարական ներդրման համար։
Մաղթում եմ արդյունավետ քննարկումներ, ոգեշնչող շփումներ և նոր համագործակցություններ՝ հանուն մեր պետության, մեր ժողովրդի և այն արժեքների, որոնք մեզ միավորում են»։
Դադարեցրել եմ անդամակցությունս «Քաղաքացիական պայմանագիր» կուսակցությանը․ Վլադիմիր Վարդանյան
Ինչո՞ւ չունենք կանաչ Երևան
Տղամարդն Իրանից Հայասատան է տեղափոխել 22 կգ թմրամիջոցով պարկ
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Գյումրու գլխավոր ճարտարապետը մեղադրյալի աթոռին է՝ կաշառք ստանալու, պաշտոնեական կեղծիքի համար
Հայաստանն ու Իրանն աշխատում են սահմանին երկրորդ կամրջի նախագծի վրա
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Իրանի հարստացված ուրանի պաշարները միջուկային օբյեկտների փլատակներում են
Սահարայի ավազները սպիտակել են
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...